ஆர்எஸ்எஸ் ஊர்வலங்களுக்கு அனுமதி எதற்கு? பார்ப்பனப் பாசிஸ்டுகளை மோதி வீழ்த்து!.

“ஒரு அரசு சாராத அமைப்புச் செய்யும் வகுப்பு மற்றும் இலக்கு வன்முறையை அதன் தலைவர் தடுக்கத் தவறினால் அவரின் தொண்டர்கள் செய்த குற்றத்திற்கு பொறுப்பேற்க வேண்டும். அதேபோல் அவரும் குற்றம் இழைத்தவர்களாகக் கருதப்படுவார்”. இந்தச் சட்டம் நடைமுறைப்படுத்தப்பட்டிருந்தால் ஆர்.எஸ்.எஸ் சங்பரிவார் அமைப்புகளின் பெருவாரியான தலைவர்கள் கைது செய்யப்பட்டிருப்பார்கள். குறிப்பாக பாஜகவில் இன்று அதிகாரத்தில் உள்ளவர்கள் சிறையில் இருந்திருப்பார்கள். ( பக்கம் 56, 60) ஆர்.எஸ்.எஸ்: இந்து தீவிரவாத கட்டமைப்பின் வேர். அரண் எழுதிய நூலில் இருந்து…

இதுவரை அமலில் உள்ள இந்திய தண்டனைச் சட்டம், இந்திய குற்றவியல் சட்டம் மற்றும் சிறப்பு பிரிவினை உள்ளடக்கிய ஊபா சட்டம், பயங்கரவாத தடுப்பு பிரிவு முன்வைக்கின்ற பல்வேறு ஆள் தூக்கி சட்டங்கள் ஆகியவை நடைமுறையில் உள்ள போதே ஆர் எஸ் எஸ் அமைப்பை ஆட்டவோ, அசைக்கவோ முடியவில்லை.

தமிழகத்தில் வன்முறைக் காடாக மாற்ற நினைக்கும் ஆர்எஸ்எஸ் பாஜகவின் விஜயதசமி நாள் கூட்டத்திற்கு தமிழக அரசு அனுமதி மறுத்ததால் உயர்நீதிமன்றத்தில் மனு போட்டு ஆர் எஸ் எஸ் அனுமதியை பெற்றுள்ளது.

“அக்டோபர் 6ம் தேதி தமிழகம் முழுவதும் 58 இடங்களில் அணிவகுப்பு நடத்த அனுமதி கோரி ஆர்.எஸ்.எஸ். அமைப்பு சார்பில் சென்னை உயர் நீதிமன்றத்தில் மனுக்கள் தாக்கல் செய்யப்பட்டன. இந்த மனுக்கள் நீதிபதி ஜி.ஜெயச்சந்திரன் முன்பு நேற்று மீண்டும் விசாரணைக்கு வந்தன. அப்போது ஆஜரான அரசு வழக்கறிஞர் கே.எம்.டி.முகிலன், ஏற்கனவே 42 இடங்களில் அனுமதி அளிக்கப்பட்ட நிலையில் மேலும் 10 இடங்களில் அனுமதி அளிக்கப்பட்டுள்ளது என்று தெரிவித்தார்.

அப்போது குறுக்கிட்ட நீதிபதி, 6 இடங்களிலும் அனுமதி அளிக்கப்படுமா என கேள்வி எழுப்பினார். இதற்கு பதிலளித்த அரசு வழக்கறிஞர், ஆவடி காவல் ஆணையர் எல்லைக்குட்பட்ட 4 இடங்களில் அனுமதி கேட்கப்பட்ட நிலையில் 2 இடங்களில் அனுமதி அளிக்கப்படவில்லை. ஒரே நாளில் 4 இடங்களிலும் பாதுகாப்பு அளிக்க இயலாது. தசரா விழா காரணமாக தூத்துக்குடி, சாயர்புரம் மற்றும் கோவை மாவட்ட ரத்தினபுரியில் அக்டோபர் 6ம் தேதி பாதுகாப்பு வழங்குவதில் சிக்கல் உள்ளது. அதேபோல, மேடவாக்கம் மற்றும் சேலையூரிலும் அனுமதி அளிப்பதில் சிரமங்கள் உள்ளன என்றார்.

படிக்க: கொலைகார ஆர்எஸ்எஸ் அமைப்புக்கு ஆள் சேர்ப்பு! தடையை நீக்கிய பாசிச கும்பல்!

இதையடுத்து மீதமுள்ள 6 இடங்களுக்கும் அனுமதி வழங்க உத்தரவிட்ட நீதிபதி, மேற்கொண்டு எந்த நிபந்தனைகளையும் விதிக்கக்கூடாது. குறிப்பிட்ட மதத்தினரின் வழிபாட்டு தலங்கள் இருக்கும் பகுதி மற்றும் கொள்கை கொண்ட கட்சியினர் அலுவலகம் இருக்கும் பகுதி என்று கூறி ஆர்.எஸ்.எஸ். அணிவகுப்புக்கு அனுமதி மறுக்கக் கூடாது. எதிர்காலங்களில், உச்ச நீதிமன்றம் மற்றும் உயர் நீதிமன்றம் உத்தரவுப்படி ஏற்கனவே வரையறுக்கப்பட்ட நிபந்தனைகளுடன் அனுமதி அளிக்க வேண்டும்”. என்று உத்தரவிட்டுள்ளார்.

படிக்க: அகண்ட பாரதமும் ஆர்எஸ்எஸ்-ன் ஆண் குறியும்.!

விஜயதசமி என்ற மத ரீதியிலான பண்டிகையை பயன்படுத்திக் கொண்டு ஆர் எஸ் எஸ் தன்னை வளர்த்துக் கொள்வதற்கு தமிழக காவல்துறையிடம் அனுமதி கேட்டது. ஆனால் அவர்கள் அதனை மறுத்துவிட்டார்கள் என்ற காரணத்தினால் உயர்நீதிமன்றத்தில் முறையீடு செய்து ஊர்வலத்திற்கான அனுமதியை பெற்று விட்டார்கள்.

ஆர்எஸ்எஸ் என்ற மூன்று முறை தடை செய்யப்பட்ட பார்ப்பன பாசிச பயங்கரவாத அமைப்பை மேலும் மேலும் வளர்வதற்கு உகந்த வகையிலேயே நீதித்துறை சட்டத்தை பயன்படுத்தி அனுமதி வழங்குகின்றது. இந்த சூழ்நிலையை தான் எழுத்தாளர் அரண் தனது நூலில் குறிப்பிடுகிறார்.

மதத்தின் பெயரால் அரசியல் செய்கின்ற பிற அமைப்புகளை வன்முறையாளர்கள், தீவிரவாதிகள், தேசத்திற்கு எதிரானவர்கள், ‘ஆன்ட்டி இந்தியன்கள்’ என்றெல்லாம் முத்திரை குத்தும் ஆர்எஸ்எஸ் அமைப்பு தான் நடத்தும் வன்முறையை மட்டும் அனுமதிக்க வேண்டும் என்று கோருகின்றது..

ஜனநாயக ரீதியாக தாங்கள் செயல்படுவதாகவும், தங்களுக்கு அனுமதி மறுக்கக்கூடாது என்றும், நீதித்துறையிடம் முறையிட்டு தனது நோக்கத்தை சாதித்துக் கொள்கிறது.

ஆர்எஸ்எஸ் போன்ற பயங்கரவாத அமைப்புகளை தடை செய் என்றும், பாசிச பாஜகவை வீழ்த்துவோம் என்று போராடுகின்ற புரட்சிகர, ஜனநாயக சக்திகள் மீது ஒடுக்கு முறையை ஏவுவது மட்டுமின்றி நேரடியாகவே RSS குண்டர்கள் கைகலப்பிலும், படுகொலையிலும் இறங்குகிறார்கள்.

நாட்டின் அரசியலமைப்புச் சட்டம் முதல் பிற அரசு நிறுவனங்களான போலீஸ், ராணுவம், நீதித்துறை, சிறைச்சாலை, அதிகார வர்க்கம் மற்றும் அரசியல் கட்சிகள் ஆகிய அனைத்தும் மதச்சார்பற்ற ஜனநாயகத்தை பாதுகாப்பதற்கு செயல்படுகிறது என்று நாம் கருதிக் கொண்டால் அது தவறாகும். அது மட்டுமல்ல மிகப்பெரிய பேரழிவை தற்போதைய சமூகத்தின் மீதும், எதிர்கால தலைமுறையின் மீதும் சுமத்துகின்ற குற்றவாளிகளாக மாறி விடுவோம் என்பதுதான் மேற்கண்ட நீதிமன்ற தீர்ப்பு மற்றும் ஆர்எஸ்எஸ் நடவடிக்கைகளில் இருந்து நாம் எடுத்துக் கொள்ள வேண்டிய பெரிய பாடமாகும்.

• பார்த்தசாரதி.