வக்ஃப் வாரிய சொத்தைத் தொடர்ந்து சர்ச்சுகளின் சொத்துக்கள் மீது பாயத் தயாராகும் ஆர்எஸ்எஸ்!

இஸ்லாமிய மதத்திற்கு மக்களால் கொடுக்கப்பட்ட நன்கொடைகளை, தானங்களை முறைப்படி நிர்வகிப்பதற்கு என்று இந்திய அரசால் வக்ஃப் வாரியம் உருவாக்கப்பட்டது. இந்த வாரியத்தை நிர்வகிப்பதற்கு என்று வக்ஃப் வாரிய சட்டம் நிறைவேற்றப்பட்டு அதன்படி இந்த வாரியம் காலம் காலமாக செயல்பட்டு வருகிறது.

மக்களால் தானமாக வழங்கப்பட்ட வக்ஃப் வாரிய சொத்துக்களை அபகரிக்க வேண்டும் என்ற நோக்கத்திற்காகவே பாஜக அரசு ஃவக்ப் வாரிய சட்டத்தில் திருத்தத்தை இப்பொழுது நிறைவேற்றியுள்ளது.

வக்ஃப் வாரிய திருத்த மசோதாவை பாராளுமன்றத்தில் நிறைவேற்றிய மகிழ்ச்சியில் உடனே ஆர் எஸ் எஸ் தனது அடுத்த தாக்குதலை, கிறிஸ்தவ சர்ச்சுகளின் சொத்துக்களுக்கு எதிராக துவக்கி விட்டது.

ஆர்எஸ்எஸ் இன் அதிகாரப்பூர்வ இணையதளமான “தி ஆர்கனைசர்- ல் “அதிக நிலங்களை வைத்திருப்பது யார்? கத்தோலிக்க சர்ச்சா அல்லது ஃவக்ப் வாரியமா – விவாதம்” என்ற தலைப்பில் ஒரு கட்டுரை எழுதப்பட்டிருந்தது.

அதில் கத்தோலிக்க சர்ச்சுகள் நாடு முழுவதும் சுமார் 7 கோடி ஹெக்டேர் (17.29 கோடி ஏக்கர்) நிலத்தை வைத்திருக்கிறது என்றும் இந்த சொத்துக்களின் மொத்த மதிப்பு சுமார் ₹ 20,000 கோடி என்றும் இந்தியாவின் ரியல் எஸ்டேட் நிலப்பரப்பில் ஒரு குறிப்பிடத்தக்க பங்கை கத்தோலிக்க சர்ச்சுகள் கொண்டுள்ளதாகவும் அந்த கட்டுரையில் எழுதப்பட்டிருந்தது.

இது ” அயோத்தியில் வென்று விட்டோம் இனி நமது இலக்கு மதுரா, காசி” என்று ஆர் எஸ் எஸ் காரர்கள் முழங்கி வருவதையும் அங்குள்ள மசூதிகளை அகற்றி அந்த இடங்களை அபகரிப்பதற்கான முயற்சிகளில் ஈடுபட்டு வருவதையும் நமக்கு நினைவு படுத்துகிறது.

இஸ்லாமிய வக்ஃப் வாரிய சொத்துக்களை அபகரிப்பதற்கான சட்டத் திருத்தத்தை கொண்டு வந்து விட்டோம். இனி கிறிஸ்தவ சர்ச்சுகளின் நிலங்களை அபகரிப்பதற்கான வேலைகளை தொடங்குவோம்“

என்று ஆர் எஸ் எஸ் முழங்குவதாகவே இதை நாம் பார்க்க வேண்டும்.

இந்தக் கட்டுரையை படிக்கும் ஆர் எஸ் எஸ் -ன் ஊழியர்கள், சர்ச்சுகளின் நிலங்களை ஆர்எஸ்எஸ் இன் புரவலர்கள் அபகரிப்பதற்கு ஏற்ப நாட்டு மக்களின் மனநிலையை பக்குவப்படுத்துவதற்கான வேலைகளை இந்தியா முழுமைக்கும் பரவலாக கொண்டு செல்வார்கள்.

இதன் மூலம் சர்ச்சுகளிடம் இருந்து நிலங்களை பறிக்க வேண்டும் என்ற கருத்து அப்பாவி இந்து மக்களின் மனங்களில் விசமரமாக வளர்த்தெடுக்கப்பட்டபின் அந்த வேலைத் திட்டத்தை வெளிப்படையாக அறிவித்து செயல்படுவார்கள்.

இதுதான் ஆர் எஸ் எஸ் இன் வழிமுறை. அதற்கு ஏற்ப தான் இந்த கட்டுரை எழுதப்பட்டிருக்கிறது. அதே சமயம் ஆர் எஸ் எஸ் ன் அதிகாரப்பூர்வ இணையதளமான ஆர்கனைசரில் பதிவேற்றிய இந்த கட்டுரை நாடு முழுதும் உள்ள ஆர் எஸ் எஸ் ன் ஊழியர்களிடம் சென்று சேர்ந்த பிறகு இப்பொழுது அந்தக் கட்டுரையை யாரும் படிக்க முடியாதபடி முடக்கி வைத்து விட்டனர்.

இப்பொழுது இந்த கட்டுரை குறித்து யாராவது கேள்வி எழுப்பினால் “அதுதான் அந்த கட்டுரையை நீக்கி விட்டோமே?” என்று கூறுவார்கள். ஆனால் நாம் மேலே கூறியபடி ஆர் எஸ் எஸ் ன் ஊழியர்கள் தங்களது பிரச்சாரத்தை நாட்டு மக்கள் இடையே தொடர்ந்து நடத்துவார்கள்.

படிக்க: 

♠ வஃக்பு சட்ட நிறைவேற்றம்: இந்தியாவின் கருப்பு தினங்களின் எண்ணிக்கை கூடுகிறது!

♠  வக்ஃப் சொத்துக்களை ஆட்டையப்போடத் துடிக்கும் காவி பாசிஸ்டுகள்!

இந்தக் கட்டுரையில் உள்ள அயோக்கியத்தனமான கருத்திற்கு எதிரான வாதங்கள் பொதுவெளியில் முன்வைக்கப்பட்டு விவாதிக்கப்படாத நிலையில் மக்கள் இவர்களின் கருத்திற்கு பலியாவதை தவிர்க்க முடியாது.

சர்ச்சு நிலங்களுக்கு எதிரான இவர்களின் கருத்துக்களை மக்களிடையே முறியடிக்க வேண்டுமானால் வக்ஃப் வாரிய சட்டத் திருத்தத்தின் நோக்கத்தையும் அதில் உள்ள அபாயத்தையும் மக்களிடையே விளக்கிப் புரிய வைக்க வேண்டும். அதன் தொடர்ச்சி தான் சர்ச்சுகளின் மீதான இவர்களின் பாய்ச்சல் என்பதை புரிய வைக்க வேண்டும்.

நம்மைப் பொறுத்தவரை மத நிறுவனங்களின் சொத்துக்கள் அரசின் கட்டுப்பாட்டில் கொண்டுவரப்பட்டு மக்களின் சொத்தாக மாற்றப்பட வேண்டும் என்று கூறுகிறோம்.

வக்ஃப் வாரியத்தின் விவசாய நிலங்கள், சர்ச்சுகளுக்கு சொந்தமான விவசாய நிலங்கள், கோவில்கள் – ஆதீனங்கள் – மட ஆலயங்களுக்கு சொந்தமான விவசாய நிலங்கள் அனைத்தும் உழுபவனுக்கே சொந்தமாக்கப்பட வேண்டும் என்று கூறுகிறோம்.

ஆனால், இஸ்லாமிய மத நிறுவனங்களின் சொத்துக்களைப் பற்றியும் கிறிஸ்தவ மத நிறுவனங்களின் சொத்துக்களைப் பற்றியும் வாய்கிழிய பேசும் ஆர்எஸ்எஸ் பாஜகவினர் ஏன் இந்து கோயில்கள், மடாலயங்கள், ஆதீனங்களின் சொத்துக்களை அரசு நிர்வகிக்க வேண்டும் என்பதை ஏற்றுக்கொள்ள மறுக்கிறார்கள்? என்பதை கேட்டு அவர்களின் நோக்கத்தை அம்பலப்படுத்த வேண்டும்.

தமிழகத்தில் அரசின் கட்டுப்பாட்டின் கீழ் உள்ள இந்து அறநிலையத் துறையை கலைக்க வேண்டும்; அதனிடம் உள்ள சொத்துக்களை இந்துக்களிடமே ஒப்படைக்க வேண்டும் என்று ஆர் எஸ் எஸ் பாஜகவினர் ஏன் முழங்கி வருகின்றனர்? என்று கேள்வி எழுப்ப வேண்டும்.

• குமரன்
  செய்தி ஆதாரம்: The telegraph