உத்திரப்பிரதேசம் சம்பல் பகுதியில் இஸ்லாமியர்கள் மீது நடத்தப்பட்டுள்ள கொலை வெறியாட்டம்!

பார்ப்பன (இந்து) மதவெறி பாசிஸ்டுகள் தனது அடுத்த கட்ட தாக்குதலை துவங்கிவிட்டனர் என்பதன் அறிகுறி தான் சம்பல் பகுதியில் நடந்துள்ள துப்பாக்கிச் சூடு மற்றும் மசூதி விவகாரம்.

மேற்கு உத்திர பிரதேசம் பகுதியில் உள்ள சம்பலின் வரலாற்றுச் சிறப்புமிக்க ஜாமா மசூதி கட்டப்பட்ட காலகட்டம் குறித்து ஆர்எஸ்எஸ் பாஜக குண்டர்கள் பொய் பிரச்சாரத்தை கட்டவிழ்த்து விட்டு வந்தனர்.

குறிப்பாக முகலாய அரசர் பாபரின் உத்தரவுப்படி இந்தப் பகுதியில் இருந்த இந்துக் கோவில் இடிக்கப்பட்டு ஜாமா மசூதி கட்டப்பட்டதாக இந்து தரப்பு, நீதிமன்றத்தில் கூறியுள்ளது.

இருப்பினும், சம்பலின் வரலாறு குறித்து ‘தாரிக்-இ-சம்பல்’ என்ற புத்தகத்தை எழுதிய மௌலானா மொயீத் கூறுகையில், “பாபர் இந்த மசூதியை பழுது பார்த்தார். எனவே, அவர்தான் இந்த மசூதியைக் கட்டினார் என்பது உண்மையல்ல,” என்று எழுதியுள்ளார்.

சம்பலில் உள்ள ஜாமா மசூதியின் மௌலானா மொயீத் கூறுகையில், “லோதி ஆட்சியாளர்களை தோற்கடித்த பாபர் 1526-இல் சம்பலுக்கு பயணம் செய்தார் என்பது வரலாற்று உண்மை. ஆனால் பாபர் ஜாமா மசூதியைக் கட்டவில்லை” என்று உண்மையில் நடந்த வரலாற்றை தெரிவிக்கின்றார்.

அயோத்தியில் ராமன் பிறந்த இடத்தில் தான் பாபர் மசூதி கட்டினார் என்ற அண்டப்புளுகை முன்வைத்து பாபர் மசூதியை இடித்த காட்டுமிராண்டி கும்பலை சார்ந்த பார்ப்பன பண்டாரங்கள் ஜாமா மசூதி குறித்தும் தனது புளுகு மூட்டைகளை அவிழ்த்து விட்டுள்ளனர்.

குறிப்பாக கைலாதேவி கோவிலின் தலைமை அர்ச்சகரான ரிஷிராஜ் கிரி மகராஜ், சம்பலில் இருக்கும் ஷாஹி மசூதியை ஹரிஹர் கோவில் என்று கூறியிருந்தார்.

ரிஷிராஜ் கிரி மகராஜ் நவம்பர் 19ஆம் தேதி அன்று சிவில் நீதிமன்றத்தில் இங்கு ஆய்வு நடத்தக் கோரி மனு தாக்கல் செய்தார். இந்த வழக்கு வர வேண்டும் என்றே காத்திருந்த நீதிமன்றம் ஏழு நாட்களுக்குள் ஆய்வு மேற்கொள்ள வேண்டுமென உத்தரவிட்டது., வீடியோ மற்றும் புகைப்படத்துடன் கூடிய அறிக்கையைச் சமர்ப்பிக்குமாறு ஆய்வுக் குழுவிடம் கூறியது.

இந்த உத்தரவின் படி ஞாயிற்றுக்கிழமை காலை மசூதியில் நீதிமன்ற உத்தரவுப்படி நடந்த ஆய்வுப் பணிகளின் போது சமாஜ்வாதி கட்சியின் முன்னணியாளர்கள் மற்றும் இஸ்லாமியர்கள் சுமார் 3000 பேருக்கு மேற்பட்டவர்கள் இந்த ஆய்வுக்கு எதிர்ப்பை தெரிவித்து போராடிக் கொண்டிருந்தனர்.

அமைதியான இந்தப் போராட்டத்தை வன்முறையாக மாற்றிய காவல் துறையினர் நடத்திய தாக்குதலில் இதுவரை குறைந்தது 5 பேர் இறந்திருப்பதாக உறுதி செய்யப்பட்டுள்ளது. இந்த சம்பவம் குறித்து மாவட்ட காவல்துறை மற்றும் உத்தரப்பிரதேசத்தின் உயர் காவல்துறை அதிகாரிகள் இஸ்லாமியர்கள் தான் வன்முறையை தூண்டியதாகவும் அவர்களுக்குள் மோதிக்கொண்டு இறந்து போயுள்ளதாகவும் பாதிக்கப்பட்ட மக்கள் மீதே குற்றம் சுமத்தி வருகின்றனர்.

ஆனால் இஸ்லாமியர்கள் மீது துப்பாக்கிச் சூடு நடத்தப்பட்டுள்ளது, இந்த துப்பாக்கி சூடு காவல்துறையால் நடத்தப்பட்டதா அல்லது பாசிச இந்துமத வெறி குண்டர்களால் நடத்தப்பட்டதா என்பதை இன்னமும் உறுதிப்படுத்தவில்லை.

படிக்க: பாப்ரி மசூதியிலிருந்து கியான்வாபி வரை ; இந்திய நீதிமன்றங்கள்!

இந்த சூழலில் மேற்கு உத்தரபிரதேசத்தில் சம்பல் நகரின் மையப்பகுதியில் அமைந்துள்ள ஷாஹி ஜாமா மசூதிக்கு வெளியே பலத்த காவல்துறை பாதுகாப்பு போடப்பட்டுள்ளது.

மசூதியின் முகப்பில் ஆங்காங்கே கற்கள் சிதறிக் கிடக்கின்றன. சாலையில் எரிந்த நிலையில் இருக்கும் வாகனங்கள் அகற்றப்பட்டாலும் அவற்றின் தடயங்கள் இன்னும் உள்ளன.

இறந்து போன ஐந்து இஸ்லாமிய இளைஞர்களும் 17 வயதில் இருந்து 25 வயதிற்கு உட்பட்ட இளம் வயது வியாபாரிகள் மற்றும் தரைக்கடை நடத்தி வந்தவர்கள். இவர்கள் மீது தான் துப்பாக்கிச் சூடு நடத்தப்பட்டுள்ளது என்பது குறிப்பிடத்தக்கது.

ஜாமா மசூதி விவகாரம் குறித்து நீதி கேட்டு போராடிய மக்களின் மீது துப்பாக்கிச் சூடு நடத்தப்பட்டது மட்டுமின்றி சுமார் 70-க்கும் மேற்பட்டவர்கள் மீது வழக்கு பதிவு செய்யப்பட்டுள்ளது 20க்கும் மேற்பட்டவர்கள் இதுவரை கைது செய்யப்பட்டுள்ளனர்.

நாடு முழுவதும் இஸ்லாமியர்கள் மீது திட்டமிட்ட தாக்குதல்கள் அதிகரித்துக் கொண்டே செல்கிறது என்பதற்கு மற்றும் ஒரு எடுத்துக்காட்டு தான் சம்பல் பகுதியில் நடந்துள்ள இந்த துப்பாக்கி சூடு மற்றும் பாசிச இந்து மதவெறி குண்டர் படையினரின் தாக்குதல்.

ஏற்கனவே அயோத்தி ராமஜென்ம பூமி விவகாரம், துவாரகா கிருஷ்ண ஜென்ம பூமி விவகாரம் என்றெல்லாம் ஒவ்வொரு பகுதியிலும் உள்ள மசூதிகளுக்கு அடியில் இந்து கோவில்கள் உள்ளதாக கூறிக்கொண்டு மதச் சிறுபான்மையினரான இஸ்லாமியர்கள் மீது கொலை வெறி தாக்குதலையும், அவர்களின் வழிபாடு மற்றும் உயிர் வாழும் உரிமை மீது வன்முறை வெறியாட்டத்தை நடத்தி வருகின்ற ஆர்எஸ்எஸ் மற்றும் பாசிச பாஜக குண்டர் படைக்கு எதிராக நேருக்கு நேர் நின்று மோதுவது ஒன்றுதான் ஒரேவழி.

• கணேசன்