டெல்லியில் தேர்தல் ஆணையத்தையும், தலைமைத் தேர்தல் ஆணையர் ஞானேஷ் குமாரையும் எதிர்த்து, மாணவர்கள் மற்றும் பல்வேறு அமைப்புகளைச் சேர்ந்தவர்கள் தொடர்ந்து போராடி வருகின்றனர். தேர்தல் நடைமுறைகளில் முறைகேடுகள் நடைபெறுவதாக அவர்கள் முன்வைக்கும் குற்றச்சாட்டுகள் குறித்து விசாரணை நடத்த வேண்டும் என்றும், தேர்தல் ஆணையர் பதவி விலக வேண்டும் என்றும் அவர்கள் வலியுறுத்தி வருகின்றனர். தேர்தல் என்பது ‘ஜனநாயக’த்தின் அடிப்படை அமைப்பாக கருதப்படும் நிலையில், தேர்தல் நடைமுறை குறித்த சந்தேகங்களையும் குற்றச்சாட்டுகளையும் எழுப்பி அவற்றை விசாரிக்கக் கோரி போராடுவது ஜனநாயக உரிமையின் ஒரு பகுதியாகவே பார்க்கப்பட வேண்டும்.
ஒரு போராட்டம் நடைபெறும்போது, அந்தப் போராட்டக்காரர்களின் கோரிக்கைகள் என்ன?, அவர்கள் முன்வைக்கும் குற்றச்சாட்டுகளுக்கு என்ன ஆதாரங்கள் உள்ளன? சம்பந்தப்பட்ட அமைப்புகளின் பதில் என்ன? என்பவற்றை மக்களிடம் கொண்டு சேர்ப்பது ஊடகங்களின் அடிப்படைப் பொறுப்பாகும். போராட்டத்தின் காட்சிகளை மட்டும் காட்டிவிட்டு, போராட்டம் எதற்காக நடைபெறுகிறது என்பதையும், அதன் பின்னணியில் உள்ள அரசியல் மற்றும் சமூகக் கேள்விகளையும் விவாதிக்காமல் இருப்பது முழுமையான பத்திரிகைச் செயல்பாடாக இருக்க முடியாது.
ஆனால், டெல்லியில் நடைபெற்று வரும் தேர்தல் ஆணைய எதிர்ப்புப் போராட்டங்களைப் பொறுத்தவரை, போராட்டக்காரர்கள் எழுப்பும் அடிப்படையான கேள்விகளைக் காட்டிலும், அவர்கள் மீது காவல்துறை எடுக்கின்ற நடவடிக்கைகளுக்கே மெயின் ஸ்ட்ரீம் கோதி மீடியாக்களில் அதிக முக்கியத்துவம் அளிக்கப்படுகிறது. இதன் காரணமாக, தேர்தல் ஆணையரின் அயோக்கியத்தனமும், பாசிச மோடியின் கூட்டு தொடர்பாக மாணவர்களும் போராட்டக்காரர்களும் முன்வைக்கும் குற்றச்சாட்டுகளும் பொதுமக்களிடம் போதுமான அளவில் விவாதிக்கப்படாமல் போகும் சூழல் உருவாக்கப்படுகிறது.
இந்த நிலையில், போராட்டக் களத்தில் நேரடியாகச் சென்று செய்திகளைப் பதிவு செய்யும் சுயாதீன பத்திரிகையாளர்கள், சிறிய YouTube ஊடகங்கள், Instagram உள்ளிட்ட சமூக ஊடகங்களில் வெளியாகும் காணொளிகள் முக்கியத்துவம் பெறுகின்றன. பிரதான ஊடகங்களில் முழுமையாக வெளிவராத போராட்டக் காட்சிகளையும், போராட்டக்காரர்களின் கருத்துகளையும் இத்தகைய ஊடகங்களே மக்களிடம் கொண்டு வருகின்றன.
இந்தப் பின்னணியில்தான் டெல்லியில் ஒரு பெண் பத்திரிகையாளர் முன்வைத்துள்ள பாலியல் அத்துமீறல் குற்றச்சாட்டு அதிர்ச்சியை ஏற்படுத்தியுள்ளது. போராட்டத்தை செய்தியாகப் பதிவு செய்து கொண்டிருந்தபோது, தன்னை ACP விவேக் பகத் என்ற காவல்துறை அதிகாரி பாலியல் ரீதியாகத் துன்புறுத்தியதாக அந்தப் பத்திரிகையாளர் புகார் அளித்துள்ளார். சம்பந்தப்பட்ட அதிகாரி மீது வழக்குப் பதிவு செய்து விசாரணை நடத்த வேண்டும் என்றும் அவர் கோரியுள்ளார்.
ஒரு பெண் பத்திரிகையாளர் காவல்துறை அதிகாரி மீது பாலியல் அத்துமீறல் குற்றச்சாட்டை முன்வைத்து காவல் நிலையத்தில் புகார் அளிக்கும்போது, அந்தப் புகாரை சட்டப்படி பெற்று, உரிய முறையில் விசாரணை நடத்தி, உண்மை என்ன என்பதை வெளிக்கொண்டு வருவது காவல்துறையின் கடமையாகும். ஆனால் புகார் அளிக்கும் உரிமையே கேள்விக்குள்ளாக்கப்படக்கூடாது.
தி வயர் செய்திகளின் படி, இந்தச் சம்பவம் தொடர்பாக மூன்று பெண் பத்திரிகையாளர்களிடமிருந்து புகார்கள் பெறப்பட்டுள்ளன. அவை Crime Branch-க்கு மாற்றப்பட்டுள்ளதாகவும், சம்பந்தப்பட்டவர்களின் வாக்குமூலங்கள் பதிவு செய்யப்பட்டு வருவதாகவும், டெல்லி காவல்துறை தெரிவித்துள்ளது. சம்பவ இடத்திலுள்ள CCTV காட்சிகள் உள்ளிட்ட ஆதாரங்கள் ஆய்வு செய்யப்படும் என்றும் காவல்துறை தரப்பில் கூறப்பட்டுள்ளது.
படிக்க:
♦ இந்தியாவின் கரப்பான்பூச்சிகள் அதிகார வர்க்கத்தை நடுங்க வைத்தது எப்படி?
♦ ஞானேஷ் குமார் பதவி விலகும்வரை போராட்டம் ஓயாது! குண்டாந்தடிகளைக் கொண்டு நிறுத்த முடியாது!
அதேவேளையில், குற்றச்சாட்டுக்கு உள்ளான காவல்துறை அதிகாரி மீது உடனடியாக FIR பதிவு செய்ய வேண்டும் என்று வலியுறுத்தி பத்திரிகையாளர்கள், மாணவர்கள் மற்றும் ஆதரவாளர்கள் காவல் நிலையத்திற்கு வெளியே திரண்டு போராட்டம் நடத்தினர். இந்தப் போராட்டம் தொடர்பாக பெண் பத்திரிகையாளர் உள்ளிட்ட சுமார் 17 பேர் காவல்துறையினரால் தடுத்து வைக்கப்பட்டனர். பின்னர் அவர்கள் மீது அனுமதியற்ற இடத்தில் போராட்டம் நடத்தியது உள்ளிட்ட சட்டப்பிரிவுகளின் கீழ் நடவடிக்கை எடுக்கப்பட்டதாக காவல்துறை தரப்பு விளக்கம் அளித்துள்ளது.
காவல்துறை தனது நடவடிக்கைக்கு சட்டம் ஒழுங்கு காரணங்களை முன்வைக்கிறது. குறிப்பிட்ட பகுதியில் கட்டுப்பாடுகள் அமலில் இருந்ததாகவும், Parliament Street காவல் நிலையம் அமைந்துள்ள பகுதி அங்கீகரிக்கப்பட்ட போராட்ட இடம் அல்ல என்றும், அந்தக் கட்டுப்பாடுகளை மீறி போராட்டம் நடத்தியதால் நடவடிக்கை எடுக்கப்பட்டதாகவும் போலீஸ் தரப்பில் தெரிவிக்கப்பட்டுள்ளது
குறிப்பாக, காவல்துறை அதிகாரி மீது பாலியல் அத்துமீறல் குற்றச்சாட்டு கூறிய பெண் பத்திரிகையாளரே, அந்தக் குற்றச்சாட்டில் நடவடிக்கை எடுக்க வேண்டும் என்று கோரி காவல் நிலையம் முன்பு நின்றபோது, தடுத்து தடுப்புக் காவலில் வைத்துள்ளது காவல்துறை. யாரை காப்பாற்ற? பாதிக்கப்பட்டு, புகார் கூறிய பெண் உட்பட ,பலரை காவல்துறை தடுப்பு காவலில் வைத்துள்ளது. இந்த கைதிற்கு காரணம் கூறும் காவல்துறை, போராடியவர்களை தடுப்பு காவலில் வைப்பதற்கு காட்டிய அவசரத்தை, குற்றம் சுமத்தப்பட்ட ACP விவேக் பகத் மீது நடவடிக்கை எடுக்காமல் விசுவாசம் காட்டுகிறது.
இந்தப் போராட்டத்தில் கலந்து கொண்ட மாணவர்கள் மற்றும் பெண்கள் காவல்துறையினரால் கையாளப்பட்ட விதம் குறித்த காணொளிகளும் சமூக ஊடகங்களில் வெளியாகியுள்ளன. போராட்டக்காரர்களை வலுக்கட்டாயமாக இழுத்துச் செல்வது, தூக்கிச் செல்வது, போலீஸ் வாகனங்களில் ஏற்றுவது போன்ற காட்சிகள் பாசிச பாஜகவின் கொடூர முகத்தை வெளிப்படுத்துகிறது. குறிப்பாக பெண்கள் மீது அதிகமான பாலியல் தாக்குதலை தொடுக்கிறது டெல்லி காவல்துறை.
தேர்தல் நடைமுறையில் முறைகேடுகள் இருப்பதாக மாணவர்கள் நம்பினால், அதுகுறித்து கேள்வி எழுப்பவும், விசாரணை கோரவும், தேர்தல் ஆணையர் பதவி விலக வேண்டும் என்று போராடவும் அவர்களுக்கு ஜனநாயக உரிமை இருக்கிறது. அவர்கள் முன்வைக்கும் குற்றச்சாட்டுகள் உண்மையா? அல்லது தவறா? என்பதை ஆதாரங்களின் அடிப்படையில் விவாதிப்பதும், விசாரிப்பதுமே ஜனநாயக முறையாகும்.
படிக்க:
♦ தேர்தல் திருட்டு: தேர்தல் ஆணையத்தில் ஆழமாக ‘அகழாய்வு’ செய்ய வேண்டும்!
ஆனால் இந்தியாவை ஆள்வது பாசிஸ்டுகள் என்பதால் அதற்கான வாய்ப்பு குறைவு. மாணவர்கள் முன்வைக்கும் குற்றச்சாட்டுகள் தவறானவை என்றால், அதற்கான ஆதாரங்களுடன் தேர்தல் ஆணையமும் அரசும் பதில் அளிக்க முடியும். குற்றச்சாட்டுகளில் உண்மை இருந்தால், உரிய விசாரணை நடத்தி தவறுகளைச் சரிசெய்ய முடியும். ஆனால் கேள்வி கேட்பவர்களை கைது செய்வது அல்லது போராட்டத்தை ஒடுக்குவது அந்தக் கேள்விகளுக்கான பதிலாகிவிடாது. ஒரு ஜனநாயக அமைப்பு எதிர்ப்புக் குரல்களைக் கேட்கவும், அதற்கு பதிலளிக்கவும் தயாராக இருக்க வேண்டும்.
இங்கு ஊடகங்களின் பொறுப்பும் மிக முக்கியமானதாகிறது. ஒரு போராட்டம் நடைபெறும்போது, போராட்டக்காரர்கள் மீது காவல்துறை எடுத்த நடவடிக்கையை மட்டும் செய்தியாக்குவது போதாது. அவர்கள் ஏன் போராடுகிறார்கள்? என்ன குற்றச்சாட்டுகளை முன்வைக்கிறார்கள்?தேர்தல் ஆணையம் என்ன பதில் அளிக்கிறது? அரசு என்ன கூறுகிறது? என்பவற்றை சமமாக மக்களின் முன் வைப்பதே பத்திரிகைத்துறையின் அடிப்படைப் பொறுப்பு.
இந்தப் பொறுப்பை பிரதான ஊடகங்கள் போதுமான அளவில் நிறைவேற்றவில்லை என்ற குற்றச்சாட்டு எழும்போது, சுயாதீன பத்திரிகையாளர்களும் சிறிய YouTube ஊடகங்களும் சமூக ஊடகங்களும் முக்கியத்துவம் பெறுகின்றன. போராட்டக் களத்தில் நேரடியாகச் சென்று பதிவு செய்யப்படும் காணொளிகள், பிரதான ஊடகங்களில் இடம்பெறாத பல காட்சிகளை பொதுமக்களின் கவனத்திற்குக் கொண்டு வருகின்றன. அந்தத் தகவல்களையும் ஆதாரங்களுடன் சரிபார்ப்பது அவசியம்தான்; அதே நேரத்தில் அவற்றை முற்றிலும் புறக்கணிப்பதும் ஊடகப் பொறுப்பல்ல.
இந்தச் சம்பவத்தில், காவல்துறை அதிகாரி மீது முன்வைக்கப்பட்டுள்ள பாலியல் அத்துமீறல் குற்றச்சாட்டு உண்மையா என்பதை சுயாதீனமான, வெளிப்படையான விசாரணைதான் தீர்மானிக்க வேண்டும். குற்றச்சாட்டு உண்மை என நிரூபிக்கப்பட்டால், சம்பந்தப்பட்ட அதிகாரி மீது சட்டப்படி கடுமையான நடவடிக்கை எடுக்கப்பட வேண்டும். குற்றச்சாட்டு நிரூபிக்கப்படவில்லை என்றால், அதற்கான காரணங்களும் விசாரணையின் முடிவுகளும் வெளிப்படையாக மக்களுக்குத் தெரிவிக்கப்பட வேண்டும்.
அதேபோல், போராட்டத்தில் பங்கேற்ற மாணவர்கள், பெண்கள் மற்றும் பத்திரிகையாளர்கள் மீது காவல்துறை மேற்கொண்ட நடவடிக்கையும், சட்டத்தின் அடிப்படையில் பரிசீலிக்கப்பட வேண்டும். போராட்டம் சட்டத்திற்கு முரணாக நடைபெற்றிருந்தால், அதற்கான சட்ட நடைமுறை என்ன என்பது தெளிவாக இருக்க வேண்டும். அதே நேரத்தில், சட்டம் ஒழுங்கை நிலைநாட்டும் பெயரில் போராட்டக்காரர்களின் ஜனநாயக உரிமைகள் தேவையின்றி கட்டுப்படுத்தப்படுகின்றனவா என்பதும் விசாரிக்கப்பட வேண்டும்.
டெல்லியில் நடக்கும் இந்தச் சம்பவம் ஒரு தனிப்பட்ட காவல்துறை–பத்திரிகையாளர் பிரச்சினையாக மட்டும் பார்க்கப்படக்கூடாது. இது தேர்தல் ஆணையத்தின் மீதான நம்பிக்கை, தேர்தல் நடைமுறைகள் குறித்த பொதுமக்களின் கேள்விகள், மாணவர்களின் போராட்ட உரிமை, பெண்களின் பாதுகாப்பு, பத்திரிகையாளர்களின் சுதந்திரம் மற்றும் காவல்துறையின் பொறுப்பு ஆகிய பல்வேறு ஜனநாயகக் கேள்விகளுடன் தொடர்புடையதாக உள்ளது.
டெல்லியை மொத்தமாக தனது கட்டுப்பாட்டிற்குள் வைத்திருக்கும் மோடி அரசு, போராடுபவர்களை ஒடுக்கவும், அதனை செய்தியாக்குபவர்களை தடுக்கவும் எந்த எல்லைக்கும் செல்கிறது. அதே நேரத்தில் எல்லையற்ற அதிகாரத்தையும் காவல்துறைக்கு வழங்குகிறது. அதனால் தான் காவல்துறையினர் போராடும் பெண்களிடம் எல்லை மீறுகிறார்கள். அடக்குமுறையை கையாள்கிறார்கள். அதுமட்டுமில்லாமல் பாலியல் குற்றச்சாட்டிற்கு உள்ளான காவல் அதிகாரி ACP விவேக் பகத்திற்கு பதவி உயர்வும் வழங்கியுள்ளார்கள். பாசிஸ்டுகளும், தேர்தல் ஆணையமும் கூட்டு சேர்ந்து நடத்திய அயோக்கியதனத்தை தோலுரிக்கும் மாணவர்கள், இளைஞர்கள் போராட்டம் பாசிஸ்டுகளின் வக்கிர முகத்தையும் வெளிகாட்டியுள்ளது. போராடும் மாணவர்களுக்கும் அதை வெளியுலகிற்கு கொண்டு செல்லும் துணிவான பத்திரிக்கையாளர்களுக்கும் மக்கள் அதிகாரம் எப்போதும் துணைநிற்கும்.
- நலன்
