சமூக நலனுக்காகப் போராடும் வழக்கறிஞர் வாஞ்சிநாதன் மீதான தாக்குதலை எதிர்த்து நிற்போம்!

சென்னை உயர்நீதிமன்றத்தின் மதுரை கிளையில், நீதிபதி ஜி.ஆர்.சுவாமிநாதன் மற்றும் நீதிபதி கே.ராஜசேகர் ஆகியோர் அடங்கிய அமர்வு, கடந்த ஜுலை 24ந்தேதி  ரிட் மேல்முறையீடு ஒன்றை விசாரித்தபோது, வழக்கறிஞர் வாஞ்சிநாதன் ஒரு தரப்புக்கு வக்காலத்து பதிவு செய்திருந்ததை பார்த்து, அவரை நேரில் அழைத்து வழக்குக்கே தொடர்பில்லாத கேள்விகளைக் கேட்டு  விசாரணைக் கூண்டில் ஏற்றியுள்ளது.

குறிப்பிட்ட அந்த வழக்கில் இருந்து தான் விலகியது குறித்து வழக்கறிஞர் வாஞ்சிநாதன் பதிவு செய்த போதும், அவர் மீது அமர்வு தொடங்கிய நடவடிக்கையை முடிவுக்குக் கொண்டுவர முடியாது என்று கூறியது மட்டுமல்லாமல், நீதிபதி சுவாமிநாதன் மீது நீதித்துறை கடமைகளை நிறைவேற்றுவதில் வகுப்புவாத மற்றும் சாதி சார்புகளை வெளிப்படுத்துவதாக வாஞ்சிநாதன் சமூக ஊடகங்களில் குற்றம் சாட்டியதாகக்  குறிப்பிட்டு, நீதிபதிக்கு முறையற்ற நோக்கத்தை காரணம் காட்டுவதாகவும் குற்றஞ்சாட்டி  கேள்வி எழுப்பியது.

மேலும், வழக்கறிஞர் வாஞ்சிநாதனின் நடத்தை ஒரு வழக்கறிஞருக்குத் தகுதியற்றது என்று கூறிய நீதிமன்ற அமர்வு, இந்திய பார் கவுன்சிலால் வழக்கறிஞர் வாஞ்சிநாதன் முன்பு இடைநீக்கம் செய்யப்பட்டதைக் குறிப்பிட்டு, இடைநீக்கம் ரத்து செய்யப்பட்ட பிறகு அவர் தனது நடத்தையை மேம்படுத்திக் கொள்வார் என்று எதிர்பார்க்கப்பட்டது. ஆனால், அவர் தனது நடத்தையை மாற்றிக்கொள்ளவில்லை என்றும், நீதித்துறையை தொடர்ந்து அவதூறாகப் பேசி வருவதாகவும், நீதிமன்றத்தின் தீர்ப்பை விமர்சிப்பது ஒரு விஷயம், ஒரு நீதிபதி மீது அவதூறு பரப்புவது வேறு விஷயம் என்றும், வாஞ்சிநாதன் கூறிய அவதூறான குற்றச்சாட்டுகள் நீதிமன்ற அவமதிப்பு குற்றமாகும் என்று அச்சுறுத்திவிட்டு, வாஞ்சிநாதனிடம் அவர் தனது கூற்றில் உறுதியாக இருக்கிறாரா என்பது குறித்து கேள்வி எழுப்பி உள்ளது.

எந்த தயாரிப்பு இல்லாமல் இருந்த வழக்கறிஞரை பார்த்து இந்த (blitzkrieg) எதிர்பாரா தாக்குதலுக்கு உடனடியாக பதிலளிக்க வேண்டும் என்று கோரியுள்ளது நீதிமன்றம்.  அதற்கு அவர் எழுத்துப்பூர்வமாக கேள்வி கேட்டால் பதிலளிப்பதாக கூறியுள்ளார். எழுத்துப்பூர்வமாக கேள்வி கேட்க கோரிய வழக்கறிஞர் வாஞ்சிநாதனை பார்த்து, “கேள்விக்குப் பதிலளிக்க மறுக்கிறீர்கள். நீங்கள் ஒரு கோழையா” என்று திமிர்த்தனமாக பேசி, ஒரு வழக்கறிஞரை நீதிமன்றத்திலேயே அவமதிப்பு செய்துள்ளார் நீதிபதி ஜி.ஆர்.சுவாமிநாதன்.

மேலும், எழுத்துப்பூர்வமாக அவரிடம் கேள்வி எழுப்பி, ஜூலை 28 ஆம் தேதி மதியம் 1:15 மணிக்குள் நேரில் பதிலளிக்குமாறு கேட்டுள்ளது.

ஏன் இந்த திடீர் தாக்குதல்?

மதுரையைச் சேர்ந்த வழக்கறிஞர் வாஞ்சிநாதன் நீண்ட காலமாக மக்கள் உரிமை பாதுகாப்பு மையத்தின் மாநில ஒருங்கிணைப்பாளராக செயல்பட்டு வருபவர். மக்கள் அதிகாரம், மக்கள் கலை இலக்கியக் கழகம் உள்ளிட்ட புரட்சிகர, ஜனநாயக அமைப்புகளுடன் இணைந்து தில்லைக் கோயில் தமிழ் பாடும் உரிமைப் போராட்டம், வைகுண்டராசனின் தாதுமணல் கொள்ளை எதிர்ப்புப் போராட்டம், ஸ்டெர்லைட் எதிர்ப்புப் போராட்டம், கூடங்குளம் அணு உலை எதிர்ப்புப் போராட்டம் எனப் பலவற்றில் முக்கிய பங்காற்றியுள்ளார்.  அனைத்து ஜாதியினர் அர்ச்சகர் நியமனம் தொடர்பான வழக்குகளையும் நீதிமன்றத்தில் தொடர்ந்து நடத்தி வருகிறார். அந்த வழக்கில் அனைத்து ஜாதியினர் அர்ச்சகர் நியமனம் செல்லாது என தீர்ப்பு வழங்கிய அமர்வில் ஜி.ஆர்.சுவாமிநாதன் இருந்தார்‌ என்பது குறிப்பிடத்தக்கது. பல்வேறு வழக்குகளில் நீதிபதி ஜி.ஆர்.சுவாமிநாதனுக்கும் வழக்கறிஞர் வாஞ்சிநாதனுக்கும் காரசாரமான விவாதங்கள் நடந்துள்ளது.

நீதித்துறை பாசிசம் குறித்த கட்டுரைகள்:

காவிமயமாகிய நீதித்துறை: – ஜி.ஆர்.சுவாமிநாதன்-லெட்சுமி நாராயணன்களே சாட்சி!

இந்திய நீதித்துறையின் அவலமும் – பாசிசக் காவிக் கூட்டத்தின் ஆட்டமும்! 

இனியாவது மக்கள் பக்கம் நிற்குமா இந்திய நீதித்துறை?

நீதித்துறையின் அன்னா ஹசாரே! நீதிபதி ஆனந்த் வெங்கடேஷ்!

ஹத்ராஸ் சிறுமியை மீண்டும் கொன்ற நீதித்துறை

நீதித்துறை கவலைக்கிடம்!  ஏமாற்றத்தில்/ வருத்தத்தில் சட்ட உலகம்!

சமீபத்தில் மதுரையில் நடந்த டங்ஸ்டன் சுரங்க எதிர்ப்புப் போராட்டம், திருப்பரங்குன்றத்தை அயோத்தியாக மாற்றத் துடிக்கும் ஆர்.எஸ்.எஸ் கும்பலை எதிர்த்துப் போராட்டம் எனத் தொடர்ந்து களத்தில் இறங்கி செயல்பட்டு வருபவர். வாஞ்சிநாதனின் இத்தகைய போராட்டங்களைத் தங்கள் செயல்திட்டத்துக்கு இடையூறாக கருதுகிறது ஆர்.எஸ்.எஸ் – பாஜக கும்பல். அவரை எப்படியாவது முடக்க வேண்டும் என எத்தனித்துக் கொண்டு இருக்கும் சங்கி கும்பல்.

இந்நிலையில், மக்கள் உரிமை பாதுகாப்பு மையம் சார்பாக வழக்கறிஞர் வாஞ்சிநாதன் உச்சநீதிமன்ற தலைமை நீதிபதிக்கு புகார் கடிதம் அனுப்பி உள்ளார். “உச்சநீதிமன்றத்திற்கு மட்டும் அனுப்பப்பட்ட அந்த புகார் வழக்கறிஞர்கள் மத்தியிலும், சமூக வெளியிலும் பரப்பப்பட்டுள்ளது. அதிமுகவைச் சேர்ந்த வழக்கறிஞர் ராஜராஜன் என்பவரே இதை முதலில் வழக்கறிஞர்கள் குழுவில் பதிவிட்டுள்ளார். அவருக்கு இந்த புகார் கடிதம் எப்படி கிடைத்தது என்பது மிகப்பெரிய கேள்விக்குறியாகவுள்ளது. இது தனது பணி பாதுகாப்புக்கும், உயிருக்கும் அச்சுறுத்தலை ஏற்படுபடுத்தியுள்ளது” என்று பேட்டி அளித்துள்ளார் வழக்கறிஞர் வாஞ்சிநாதன். மோடியின் ஆட்சியில் அனைத்து துறைகளைப் போல் நீதித்துறையும் காவி மயமாக்கப்பட்டுள்ள நிலையில், நீதிமன்றங்கள் தானாக ஜனநாயக உரிமைகளைப் பாதுகாக்கும் என்று எதிர்பார்க்க முடியாது.

நீதிபதி ஜி.ஆர்.சுவாமிநாதன் மீது பிராமண‌ சாதி சாய்வுடனும், ஆர்.எஸ்.எஸ் சித்தாந்த சார்புடனும் நீதி பரிபாலனை செய்வதாகவும் குற்றஞ்சாட்டி அவர் மீது விசாரணை கோரியும், அதற்கு சான்றாக, குறிப்பிட்ட வழக்கறிஞரின் வழக்குகளுக்கு முன்னுரிமை கொடுத்தது, அங்கப்பிரதட்சணம் வழக்கில்  மூட நம்பிக்கைக்கு ஆதரவாக, சுயமரியாதைக்கு எதிராக அவர் அளித்த தீர்ப்பு, அனைத்து சாதியினரும் அர்ச்சகர் நியமனம் தொடர்பான வழக்கு விசாரணையின் போது தன்னை ஒரு “ஸ்மார்த்த பிராமணர்” என்று கூறியது மட்டுமல்லாமல், பிராமணரல்லாதவர்கள் அர்ச்சகர் ஆவது குறித்து ஆட்சேபம்  தெரிவித்தது உட்பட 15 நிகழ்வுகளைச் சுட்டிக்காட்டி ஆதாரபூர்வமாக அளித்த புகார் கடிதம்  நீதிபதி ஜி.ஆர்.சுவாமிநாதனுக்கு ஆத்திரத்தை உண்டாக்கியுள்ளது. அவரது தனிப்பட்ட கோபத்தை வரைமுறையின்றி வெளிப்படுத்தியது மட்டுமல்லாமல், தானே அது குறித்து ஒரு நீதிமன்ற அவமதிப்பு விசாரணையைத் தொடங்கி உள்ளார். வழக்கறிஞர் வாஞ்சிநாதனை “நீங்கள்  கோழையா” என்று கேள்வியெழுப்பிய நீதிபதி ஜி.ஆர்.சுவாமிநாதன் தன் மீதான புகார் உச்சநீதிமன்றத்திற்குச் சென்றதை கண்டு அஞ்சி கோழைத்தனமாக தானே தன் வழக்கில் நீதிபதியாக அமர்ந்துள்ளார். சற்றே நேர்மையும், தைரியமும் இருப்பவராயின் இந்த வழக்கை அவர் தொடங்கி இருக்கக் கூடாது. உச்சநீதிமன்றத்தில் விசாரணை வந்திருந்தால் அதை எதிர்கொண்டு இருக்க வேண்டும். புகார் கொடுத்த வரை  அதிகார திமிருடன் மிரட்டல் விடுத்திருக்கக்கூடாது.

நீதித்துறை ஆர்.எஸ்.எஸ் மயமாகியுள்ளதிற்கு இது ஓர் சான்று. உச்சநீதிமன்ற தலைமை நீதிபதிக்கு அனுப்பிய புகார் மனு வெளியே வந்ததிலிருந்தே நாம் இதை புரிந்துக் கொள்ள முடியும். நீதித்துறையில் ஆர்.எஸ்.எஸ் – பாஜக அமர்ந்துக் கொண்டு பெரும்பான்மை மக்களுக்கு எதிரான நீதியை வழங்கிக் கொண்டுள்ளது. நீதிபதிகள் ஆர்.எஸ்.எஸ் கூட்டங்களில் கலந்துக் கொள்வது மட்டுமல்லாமல் மதசார்பின்மைக்கு எதிராக பேசுவதும் நடந்துள்ளது. நீதித்துறை பாசிசத்தை அம்பலப்படுத்தி மக்கள் அதிகாரம் இணையதளத்தில் பல்வேறு கட்டுரைகளை எழுதியுள்ளோம்.

வழக்கறிஞர் வாஞ்சிநாதன் மீதான இந்த நீதிமன்ற அவமதிப்பு வழக்கு நீதிபதிகள் மீதோ எந்த தனிநபர் மீதோ புகார் அளிக்கும்  அரசியல் அமைப்பு சட்ட உரிமையைப் பறிப்பதாகும். இது வாஞ்சிநாதன் மீதான பாசிச தாக்குதல் மட்டுமல்ல, சமூக பொறுப்புணர்வுடன் இயங்கும் வழக்கறிஞர்களுக்கும், செயற்பாட்டாளர்களுக்கும் விடுக்கப்பட்டுள்ள அச்சுறுத்தல் என்பதாகவே எடுத்துக் கொள்ள முடியும். இந்த வழக்கை திரும்பப் பெறக் கோரிப் போராடுவது வழக்கறிஞர்கள், ஜனநாயக சக்திகள் அனைவரின் கடமையாகிறது.

• திருமுருகன்