கொலைகார காவல் துறையினருக்கு மரண தண்டனை: காவல்துறையின் அதிகார மமதையில் விழுந்த சம்மட்டி அடி!

சாத்தான்குளம் ஜெயராஜ் – பென்னிக்ஸ் படுகொலை வழக்கில் மதுரை மாவட்ட நீதிமன்றம் வழங்கியுள்ள மரண தண்டனை தீர்ப்பு இந்திய நீதித்துறை வரலாற்றில் மிக மதிப்பு வாய்ந்த ஒன்றாகும். இந்த தீர்ப்பு மேல்முறையீட்டில் குறைக்கப்படலாம். ஆனால் மிக முன்னுதாரணம்மிக்க, வானளாவிய அதிகாரம் கொண்டதாக தன்னை நினைத்துக் கொள்ளும் காவல்துறையின் அதிகாரம் மமதையில் விழுந்த சம்மட்டி அடியாகும்.

சாத்தான்குளம் பென்னிக்ஸ்- ஜெயராஜ் படுகொலை என்பது காவல்துறையின் கோர முகத்தையும் அது ஒரு அடக்குமுறை இயந்திரமாகச் செயல்படுவதையும் பட்டவர்த்தனமாக அம்பலப்படுத்திய சம்பவமாகும். இந்த வழக்கில் வழங்கப்பட்டுள்ள நீதியையும், அதற்குப் பின்னால் இருக்கும் காவல்துறையின் அதிகாரத் திமிரும் மக்களை அச்சம் கொள்ள வைக்கிறது.

அரசு பயங்கரவாதத்தின் சாட்சி: சாத்தான்குளம் தீர்ப்பு

காவல்துறை உலகம் முழுக்கவே மக்களுக்கு எதிரான, அவர்களிடமிருந்து அந்நியப்பட்ட ஒரு அமைப்பாகவே இருந்து வருகிறது. ஒவ்வொரு நாட்டு மக்களும் அவர்களே புரிந்துக் கொள்ளும்படியான அனுபவத்தையும் காவல்துறை வழங்கியுள்ளது. குறிப்பாக தமிழ்நாட்டின் காவல்துறை செய்த அடக்குமுறை படுகொலைகள் ஏராளம். வாச்சாத்தி, ஸ்டெர்லைட், சாத்தான்குளம், மாஞ்சோலை என பல உதாரணங்கள் உள்ளது. அதில் சாத்தான்குளம் நம் கண் முன் உள்ள சாட்சியாக உள்ளது.

தூத்துக்குடி மாவட்டம் சாத்தான்குளத்தில் 2020-ஆம் ஆண்டு தந்தை ஜெயராஜ் மற்றும் மகன் பென்னிக்ஸ் ஆகியோர் காவல்துறையினரால் கொடூரமாகத் தாக்கப்பட்டு உயிரிழந்த வழக்கில், மதுரை மாவட்ட கூடுதல் அமர்வு நீதிமன்றம் மார்ச் 23, 2026 அன்று வரலாற்றுச் சிறப்புமிக்க தீர்ப்பை வழங்கியுள்ளது. குற்றம் சாட்டப்பட்ட அனைத்து காவலர்களும் “குற்றவாளிகள்” என்றும், இது தற்கொலையோ அல்லது இயற்கையான மரணமோ அல்ல, திட்டமிடப்பட்ட “கொலை” என்றும் நீதிமன்றம் உறுதிபடத் தெரிவித்துள்ளது.

காவல்துறை ஆய்வாளர் ஸ்ரீதர், உதவி ஆய்வாளர்கள் பாலகிருஷ்ணன், ரகுகணேஷ் உள்ளிட்ட ஒன்பது பேர் இந்தக் கொடூரக் கொலையில் குற்றவாளிகளாக அறிவிக்கப்பட்டுள்ளனர். 9 பேருக்கும் மரண தண்டனை வழங்கியுள்ளது நீதிமன்றம். இந்தத் தீர்ப்பில் லத்திகளில் இருந்த ரத்தம் டிஎன்ஏ ஆய்வின் மூலம் உறுதி செய்யப்பட்டதும், அவர்கள் அழைத்துச் செல்லப்பட்ட வாகனத்தில் இருந்த ரத்த மாதிரிகளும் மிக முக்கிய ஆதாரங்களாகக் கொள்ளப்பட்டன.

போலீசின் அதிகாரத் திமிரும் காட்டுமிராண்டித்தனமும்

இந்தக் கொலைகளின் பின்னணியைப் பார்த்தால், காவல்துறையினர் மக்களைப் பாதுகாக்கும் நண்பர்கள் அல்ல, மாறாக அதிகாரத் திமிர் கொண்ட பாசிச மனப்பாங்கு கொண்டவர்கள் என்பது தெளிவாகிறது. கொரோனா காலத்தில் கடையைச் சற்று கூடுதல் நேரம் திறந்து வைத்திருந்ததாகக் கூறி, எவ்விதக் காரணமுமின்றி ஜெயராஜைக் கைது செய்தனர்.

தனது தந்தையைக் கைது செய்ததைத் தட்டிக்கேட்ட பென்னிக்சையும் கைது செய்து, காவல் நிலையத்தில் வைத்து இரவு முழுவதும் காட்டுமிராண்டித்தனமான சித்திரவதைகளை அரங்கேற்றினர்.

படிக்க:

♦ பெனிக்ஸ் – ஜெயராஜ் கொலை வழக்குத் தீர்ப்பும் நிரந்தர தீர்வும்: மா-லெ பார்வை

♦ திருப்புவனம் –காவலாளி அஜீத் குமார் அடித்துப் படுகொலை! தமிழ்நாடு போலீசு படு அட்டூழியம்!

ஊரே மயான அமைதியாக இருந்த அந்த இரவில், காவல் நிலையத்திலிருந்து இவர்களின் அலறல் சத்தம் தெரு முழுவதும் எதிரொலித்ததாக அப்பகுதி மக்கள் சாட்சியம் அளித்தனர்.

சித்திரவதையின் காரணமாகக் கடுமையான ரத்தப்போக்கு இருந்தபோதிலும், பொய் வழக்குகளைப் புனைந்து அவர்களைக் கோவில்பட்டி சிறைக்கு அனுப்பினர். இதில் அரசு மருத்துவர் உடல் தகுதிச் சான்றிதழ் வழங்கிக் காவல்துறையினருக்குத் துணையாகச் செயல்பட்டது கிரிமினல் தனத்தின் உச்சமாகும்.

கடையை கூடுதல் நேரம் திறந்து வைத்திருந்ததற்காகத்தான் இருவரும் கைது செய்யப்பட்டு கொலை செய்யப்பட்டனரா? இல்லை. “விலையுயர்ந்த செல்போனை இலவசமாகத் தரும்படி சாத்தான் குளம் போலிசார் ஜெயராஜிடம் கேட்டதற்கு, அவர் மறுத்திருக்கிறார். இதற்குப் பாடம் புகட்டுவதற்குத்தான் ஜெயராஜையும், பென்னிக்ஸையும் சித்திரவதை செய்து கொன்றுவிட்டதாக” ஜெயராஜின் மகள் குற்றஞ்சுமத்தியிருக்கிறார்.

காவல்துறை: Trained Dogs

ஜெயராஜ்-பென்னிக்ஸ் இருவரையும் கைகளை கயிற்றால் கட்டி மேலிருந்து தொங்கவிட்டு தாக்கி உள்ளது பிரேத பரிசோதனை அறிக்கையில் தெரியவந்துள்ளது. டேபிளில் படுக்க வைத்தும் தாக்கி உள்ளனர். இருவரையும் காவல்துறையினர் தாக்கும் போது நாம் அடித்து பழகுவதற்கு அப்பா, மகன் கிடைத்துள்ளனர் எனவும், இவர்களை அடித்து நாம் பயிற்சி எடுத்துக் கொள்வோம் என்றும் காவல்துறையினர் அவர்களுக்குள் பேசியுள்ளனர்.

முதல் குற்றவாளியான ஸ்ரீதர், அடிக்கச் சொல்லி கூறினார். அடிப்பதை யாரும் பார்க்கிறார்களா என்பதை கண்காணிக்க காவல் நிலையத்தில் வெளியே இருந்து தாமஸ் பிரான்சிஸ் கண்காணித்து வந்தார் என குற்றப்பத்திரிகையில் உள்ளது.ஜெயராஜிற்கு இருதய மற்றும் நுரையீரல் பிரச்னை இருந்தது. ஆனால் நோய் தொற்று காரணமாக அவர்கள் உயிரிழக்கவில்லை. கம்பு, கம்பி போன்ற ஆயுதங்களால் கொடூரமாக  தாக்கியதாலே இறப்பு நடந்துள்ளதாக அரசு மருத்துவர்கள் பிரேத பரிசோதனை அறிக்கையில் கூறியுள்ளனர்.

ஆளும் வர்க்கத்தின் கைக்கூலியும் அடக்குமுறை எந்திரமும்

சிபிஐ விசாரணையின் போது காவல்துறையினர் நடந்து கொண்ட விதம், அவர்கள் தங்களைச் சட்டத்திற்கு மேலானவர்களாகக் கருதுவதை உறுதிப்படுத்தியது. குறிப்பாக, இந்த விவகாரத்தை விசாரிக்கச் சென்ற கோவில்பட்டி நீதித்துறை நடுவர் பாரதிதாசனை ஒரு காவலர் “உன்னால் ஒன்றும் புடுங்க முடியாது” என்று திமிராகப் பேசியது, காவல்துறையின் அதிகாரத் திமிரைக் காட்டுகிறது.

படிக்க:

♦ வேப்பந்தட்டை பட்டியல் இன இளைஞர் படுகொலை! சாதிவெறியர்களுக்குத் துணை போன காவல்துறை!

♦ கொலைகார ஸ்டெர்லைட்டிற்கு அடியாள் வேலை பார்க்கும் தூத்துக்குடி காவல்துறை!

மேலும், சாட்சியங்களை அழிக்கச் சாத்தான்குளம் காவல் நிலையத்தின் சிசிடிவி பதிவுகள் தினந்தோறும் அழியும்படி மாற்றப்பட்டிருந்ததும் அம்பலமானது.

காவல்துறை என்பது எப்போதுமே ஆளும் வர்க்கத்தின் ஏவல் நாயாகவே இருந்து வந்துள்ளது. தூத்துக்குடி துப்பாக்கிச் சூடு தொடங்கி சாத்தான்குளம் படுகொலை வரை, காவல்துறையின் நடவடிக்கைகள் யாவும் உழைக்கும் மக்களையும், எளியவர்களையும் ஒடுக்கி, கார்ப்பரேட் மற்றும் ஆளும் வர்க்கத்தின் நலன்களைப் பாதுகாப்பதையே நோக்கமாகக் கொண்டுள்ளன.

சீர்திருத்தம் தீர்வாகுமா? கட்டமைப்பைக் கலைப்பதே முடிவு!

ஒவ்வொரு முறை லாக்-அப் மரணங்கள் நடக்கும்போதும், காவல்துறையினருக்குப் பணிச்சுமை மற்றும் மன அழுத்தம் இருப்பதாகக் கூறி அவர்களின் குற்றங்கள் நியாயப்படுத்தப்படுகின்றன. ஆனால், இவை மன அழுத்தத்தால் நடப்பவை அல்ல; மாறாக, எந்தக் குற்றம் செய்தாலும் தங்களை அரசு மற்றும் நீதிமன்றங்கள் காப்பாற்றிவிடும் என்ற தைரியத்தால் நடப்பவை.

“நாய் வாலை நிமிர்த்த முடியாது, போலீசைத் திருத்த முடியாது” என்ற சொல்லுக்கு ஏற்ப, சட்டங்களைப் போடுவதாலோ அல்லது சீர்திருத்தங்கள் செய்வதாலோ இந்த அடக்குமுறையை நிறுத்திவிட முடியாது. காவல்துறையினருக்கு ஆயுதம் ஏந்தவும், கைது செய்யவும் வழங்கப்பட்டுள்ள மிதமிஞ்சிய அதிகாரமே அவர்கள் சட்டத்தை மதிக்காமல் இருக்கக் காரணமாகிறது.

எனவே, தற்போதுள்ள காவல்துறை கட்டமைப்பையே கலைக்க வேண்டும் என்ற கோரிக்கை முன்னெப்போதையும் விட இன்று அவசியமாகிறது. அமெரிக்காவில் ஜார்ஜ் ஃபிளாய்டு படுகொலைக்கு எதிராக எழுப்பப்பட்ட “காவல்துறையைக் கலைப்போம்” என்ற முழக்கத்தைப் போல, இங்கும் மக்களின் அதிகாரத்தைப் நிலைநாட்டும் மாற்று அமைப்புகளைப் பற்றிச் சிந்திக்க வேண்டிய நேரம் இது. இந்தத் தீர்ப்பு ஒரு வெற்றி என்றாலும், இது போன்ற படுகொலைகள் தொடராமல் இருக்கக் காவல்துறையின் வேர் வரை உள்ள அதிகார மமதையை ஒழிப்பதே நிரந்தரத் தீர்வாகும்.

• நலன்