பங்குச் சந்தையில் பங்கின் விலை நொடிக்கு நொடி மாறுவது ஏன் ?

அன்பார்ந்த வாசகர்களே!

புதிய கொரானா வைரஸ் பரவல் பற்றி கேள்விப்பட்டவுடன் உலகம் முழுவதும் ஊக வாணிப சூதாட்டமான பங்கு சந்தை படுவீழ்ச்சி அடைந்துள்ளது.
அமெரிக்காவில் ஒரு பழமொழி இருக்கிறது அதாவது வெள்ளைக்காரனுக்கு சளி பிடிக்க துவங்கினால் கருப்பினத்தவருக்கு ஜன்னி வைத்துவிடும் என்பார்கள்.
அதுபோல நிதி மூலதனத்தை கையில் வைத்துக் கொண்டு உலகை ஆட்டிப் படைக்கின்ற ஏகாதிபத்திய முதலாளித்துவம் உலகின் ஒரு மூலையில் ஏதாவது ஒரு பாதிப்பு ஏற்பட்டாலும் சீட்டுக்கட்டு போல சரிந்து விழுகிறது.

அன்றாடம் காலையில் எழுந்தவுடன் பங்கு மார்க்கெட்டில் என்ன நிலைமை என்று தெரிந்துகொள்வது முதலாளிகள் பிரச்சனையாக இல்லை. தனது கையில் உள்ள பணத்தை பாதுகாப்பாக எதிலாவது முதலீடு போட வேண்டும் என்ற நடுத்தர வர்க்கத்தின் மனக்கிளர்ச்சியிலிருந்து பங்குசந்தை உயிர் பெறுகிறது.
கடந்த நவம்பர் 26 ஆம் தேதி இந்தியாவின் பங்கு சந்தையில் முதலீட்டாளர்களின் முதலீட்டு தொகை சுமார் 14 லட்சம் கோடி ரூபாய் முதலீடு திடீரென்று காணாமல் போனது.

அதாவது பங்கு சந்தையை நம்பி முதலீடு செய்தவர்களின் பணம் 14 லட்சம் கோடி ரூபாய் திடீரென்று அழிந்து போனது அல்லது அவர்களை நட்டத்திற்கு தள்ளியது என்று நாகரீகமாக சொல்லலாம்.

பங்கு சந்தை என்றால் என்ன? ஏன் அது அன்றாடம் ஏறி இறங்குகிறது என்பதைப்பற்றி வாசகர்களுக்கு அறிமுகப்படுத்தும் என்ற வகையில் எமது தளத்தில் வெளியிட்ட கேள்வி பதிலையும் பத்திரிக்கையாளர் மு.வி. நந்தினி எழுதிய முகநூல் பகிர்வையும் இத்துடன் இணைக்கிறோம்.

தோழமையுடன்,
ஆசிரியர் குழு,
மக்கள் அதிகாரம்.

♦♦♦

கேள்வி:  ஆன்லைன் பங்குச் சந்தை வர்த்தகத்தில்.. பங்கின் விலை மற்றும் பொருளின் விலை ஏற்றம் இறக்கம் நொடிக்கு நொடி மாறுகிறது. இது எப்படி…?

பங்குச்சந்தை வர்த்தகத்திற்கும் விலைவாசி உயர்வுக்கும் சம்பந்தம் இருக்கிறதா..?

பங்குகளின் (equity) விலை பொருட்களின் (commodity) விலை ஏற்றம் இறக்கத்திற்கு எப்படி சாத்தியமாகும்..?

– எம். ஃப்ராங்கிளின்

அன்புள்ள ஃப்ராங்கிளின்,

இந்தியாவில் இரண்டு பங்குச் சந்தைகள் இருக்கின்றன. மும்பை தலால் தெருவில் இருக்கும் மும்பை பங்குச் சந்தை 1875-ம் ஆண்டு துவங்கப்பட்டது. இது ஆசியாவின் முதல் பங்குச் சந்தையாகும். தற்போது உலக அளவில் பத்தாவது பெரிய சந்தையாக மதிப்பிடப்பட்டிருக்கிறது.

மும்பையில் இருக்கும் தேசியப் பங்குச் சந்தை 1993-ம் ஆண்டு துவங்கப்பட்டது. நவீனவசதிகளுடன் வர்த்தகம் செய்யும் இந்தச் சந்தை உலகின் பதினோராவது பெரிய சந்தையாக மதிப்பிடப்பட்டிருக்கிறது.

இரண்டு பங்குச் சந்தைகளிலும் சுமார் நான்காயிரம் நிறுவனங்கள் வர்த்தகம் புரிகின்றன. இவை இந்திய மொத்த உள்நாட்டு வருமானத்தில் நான்கு சதவீதத்தையே கொண்டிருக்கின்றன. இந்தியாவின் கார்ப்பரேட் நிறுவனங்களது அனைத்து மதிப்பையும் சேர்த்தால் அவை மொத்த உள்நாட்டு உற்பத்தியில் 12-14 சதவீதத்தையே கொண்டிருக்கின்றன என்கிறார் ஒரு ஆய்வாளர். மற்றபடி பெரும்பான்மையான மொத்த உள்நாட்டு வருமானம் முறைசாரா தொழில்கள் மூலமே வருகிறது.

இரண்டு பங்குச் சந்தைகளில் துறைவாரியாக முக்கிமாக கருதப்படும் நிறுவனங்கள் பட்டியல் நிறுவனங்கள் என்று அழைக்கப்படும். இவற்றின் பங்குகள் வர்த்தகம் ஒரு நாளில் எவ்வாறு என்பதைப் பொறுத்து பங்குச் சந்தையின் குறியீட்டெண் மதிப்பிடப்படுகிறது. இதை வைத்து பங்குச் சந்தையின் வர்த்தகப் போக்கை மதிப்பிடுகிறார்கள். அதாவது பங்குச் சந்தை குறியீட்டெண் அதிகரிக்கிறது, குறைகிறது என்பது இப்படித்தான்.

“எக்னாமிக்ஸ் டைம்ஸ்” பத்திரிகை மதிப்பீட்டின் படி இந்தியாவில் ஆறு கோடிப்பேர் தங்களது சேமிப்பை பங்கு வர்த்தகத்திலும், பரஸ்பர நிதியங்களிலும் முதலீடு செய்கின்றனர். பிமால் ஜாலன் கமிட்டி அறிக்கையின் படி இந்திய மக்கள் தொகையில் 1.3% நபர்களே பங்குச் சந்தையில் முதலீடு செய்திருக்கிறார்கள். இது அமெரிக்காவில் 27% ஆகவும், சீனாவில் 10% ஆகவும் இருக்கிறது.

சரி, பங்குச் சந்தையில் பங்குகளின் விலை நொடிக்கு நொடி எப்படி மாறுகிறது?

பங்குச் சந்தையில் நிறுவனங்கள் முக மதிப்போடு பங்குகளை வெளியிடுகின்றன. சான்றாக டாடா நிறுவனம் தனது பங்கு விலையின் முக மதிப்பை ரூ. 10 என்று 1995 -ல் வெளியிட்டிருக்கிறது என்று வைப்போம். இன்றைக்கு அந்த பங்கின் விலை ரூ.100 -ஆக மாறியிருக்கிறது. அதாவது தொடர்ந்து அந்த பங்கின் விலை கொஞ்சம் கொஞ்சமாக உயர்ந்து ரூ.100-ஆக உயர்ந்திருக்கிறது. சரி, இன்னும் சில மாதங்களில் அது 125-ஆக மாறும் என எதிர்பார்த்து இன்று சிலர் அதை ரூ.100 கொடுத்து வாங்குகிறார்கள்.

ஆனால் இன்னும் சில நாட்களில் அது விலை உயர்வுக்கு பதில் ரூ.90 ஆக குறைந்திருக்கிறது. அப்படி எனில் அதை நூறு ரூபாய்க்கு வாங்கியவர்கள் பங்கு ஒன்றுக்கு பத்து நட்டமடைகிறார்கள். தொடர்ந்து அது நட்டமடையும் என எதிர்பார்த்து ஒருவர் தன்னிடம் உள்ள 100 டாடா பங்குகளையும் விற்றுவிட்டால் அவர் ரூ.1000 நட்டமடைகிறார். இல்லை இன்னும் சில நாட்களில் பங்கு விலை சீராகி உயரும் என நினைத்து அவர் அப்படியே வைத்துக் கொள்ளவும் செய்யலாம். அவர் நினைத்தபடி சில மாதங்களில் பங்குகள் ரூ.140 என உயர்ந்து அவர் விற்றால் ரூ.4000 ரூபாய் இலாபம் அடைகிறார். இவை அனைத்தும் பேப்பரில் நடக்கும் பரிவர்த்தனை மட்டுமே. ஒருவர் பங்குச் சந்தையிலிருந்து அடியோடு வெளியேறாத வரைக்கும் இந்த பரிவர்த்தனைகள் அனைத்தும் டிஜிட்டலில் மட்டும் நடக்கும்.

பங்குச் சந்தையில் சிறு முதலீட்டாளர்கள்தான் மேற்சொன்னவாறு பரஸ்பர நிதியங்கள் மற்றும் பங்குச் சந்தையில் முதலீடு செய்யும் 6 கோடி பேர். ஆனால் பங்குச் சந்தையில் பெரும் வர்த்தகத்தை அன்னிய நிதி நிறுவனங்கள் செய்கின்றன. இவர்கள் தினசரி இலட்சக்கணக்கான பங்குகளை வாங்குவார்கள், விற்பார்கள். சில நேரங்களில் நிறுவனங்களே தமது பினாமிகள் மூலம் பங்குகளை அதிகம் வாங்கி செயற்கையாக விலையை உயர்த்த  முயற்சி செய்யும். இதனால் காலையில் பங்குகள் விலை உயர்வது போன்று தோன்றி நாம் வாங்குவோம். மாலையில் அதன் விலை வீழும். அப்போது வீழ்ந்த விலைக்கு விற்க நினைத்தால் அது நமக்கு நட்டம். இல்லை நாளை உயரும் என எதிர்பார்த்து விற்காமலும் வைத்திருக்கலாம்.

மொத்தத்தில் பங்குச் சந்தையின் இயக்கம் என்பது ஒரு சூதாட்டம் போன்றதுதான். அதற்கும் நிஜமான பொருளாதாரத்திற்கும் சம்பந்தமில்லை. இதில் ஒரு பங்கின் விலை தொடர்ந்து உயர்ந்து கொண்டே இருக்கும் என்பதற்கு எந்த அறிவியல் அடிப்படை இல்லை. ஏனெனில் உயர்ந்து கொண்டே இருந்தால் அதை யார் தொடர்ந்து வாங்குவார்கள் என்ற கேள்வி எழுகிறது. புதுப்புது முதலீட்டாளர்கள் சேர்ந்து கொண்டே இருக்கும் போதுதான் அந்த செயற்கையான உயர்வு சாத்தியம். இது மல்டி லெவல் மார்க்கெட்டிங் போன்றதுதான். நம் நாட்டில் 130 கோடிப் பேர்களும் கற்பனையாக பங்குச் சந்தையில் சேர்ந்து விட்டால் அடுத்து பங்குகளை அதிக விலை கொடுத்து வாங்க ஆள் இல்லை. இந்நிலையில்தான் இருக்கும் சிறு முதலீட்டு பங்குதாரர்களை ஏமாற்றி அன்னிய நிதி நிறுவனங்கள் செயற்கையாக பங்குகளின் விலையை உயர்த்தியோ, தாழ்த்தியோ விளையாடுகின்றன. அவர்கள் நொடிக்கு சில பல மில்லியன் டாலர்களை முதலீடும் செய்வார்கள், திரும்ப எடுக்கவும் செய்கிறார்கள்.

எனவே பங்குச் சந்தையில் ஒருவர் இலாபமடைகிறார் என்றால் அதன் பொருள் இன்னொருவர் நட்டமடைகிறார் என்பதே. பங்குச் சந்தை முகவர்களிடம் கேட்டால் முதலில் குறைவான முதலீடுகளைச் செய்யுங்கள், பங்குகளை தவிர்த்து விட்டு பரஸ்பர நிதியங்கள், கடன் பத்திரங்களில் முதலீடு செய்யுங்கள், பங்குகளில் கொஞ்சமாக முதலீடு செய்யுங்கள் என்று ஆலோசனை கூறுவார்கள். எப்படி இருந்தாலும் இலாபம் என்றால் நட்டம் என்பது இருந்தே தீரும்.

இது போக ஒரு நிறுவனத்தின் செயல்பாடு, அவர்களது பொருட்களின் வர்த்தகம், புதிய பொருளை சந்தைப்படுத்துவது, மத்திய அரசின் நிதிக் கொள்கை, ரிசர்வ் வங்கியின் வட்டி விகிதம் போன்றவையும் பங்குச் சந்தையில் தாக்கத்தை ஏற்படுத்தலாம். இவை இரண்டாம் பட்சக் காரணங்கள் மட்டுமே. அதே போன்று உலக அளவில் அரசியல் மாறுபாடு, கச்சா எண்ணெய் விலை ஏற்ற இறக்கங்கள் இவையும் பங்குச் சந்தையில் தாக்கத்தை ஏற்படுத்தும்.

இதனால்தான் நொடிக்கு நொடி பங்குகளின் விலை ஏறி இறங்கிக் கொண்டிருக்கிறது. இதற்கும் விலைவாசி உயர்விற்கும் நேரடித் தொடர்பில்லை. விலைவாசி உயர்விற்கு அரசின் வரிக் கொள்கை, கச்சா எண்ணைய் விலை உயர்வு, மையப்படுத்தப்படாத உற்பத்தி, முதலாளித்துவ நெருக்கடி, பணவீக்கம், வேலையின்மை போன்ற பொருளாதாரக் காரணங்கள் காரணமாக இருக்கின்றன.

நன்றி!

000

2008 பங்குச்சந்தை வீழ்ந்து மீண்ட பிறகு, பங்கு முதலீடு, மியூச்சுவல் ஃபண்ட் முதலீடு குறித்து அதிகமாக வெகுஜன ஊடகங்களில் பேசப்பட்டது. வீழ்ச்சிக்கு பிறகான மீட்சி சிறு முதலீட்டாளர்களை ஈர்த்தது. ஆனால், 2009 முதல் 2014ந் தொடக்கம் வரை சந்தை மெதுவாகத்தான் ஊர்ந்தது. ஒரே பாட்டில் வாரன் பஃப்பெட் ஆகிவிடலாம் என கனவு கண்ட நடுத்தர வர்க்க சிறு முதலீட்டாளர்களுக்கு அது சலிப்பை உண்டாக்கியிருக்கும். பிறகு பங்கு முதலீடு வெற்றிக்கதைகள் ஊடகங்களில் நின்றுபோனது அல்லது பொலிவிழந்தது.

கொரோனா கால வீழ்ச்சிக்குப் பின், பங்குச் சந்தைகள் மிக வேகமாக மீண்டன. ஓராண்டின் வீழ்ச்சிக்குப் பின், அடுத்த ஓராண்டில் சராசரியாக நான்காண்டுகளில் காணும் வளர்ச்சியைக் கண்டது. இது யூட்யூபர்கள் காலம். பெரும்பாலான தொழிற்முறை யூட்யூபர்கள் நிஃப்டி 20 ஆயிரம் புள்ளிகளைத் தொட்டு நிற்கும் என்றார்கள். ஆனந்த் சீனிவாசன் மட்டும் இது அதிகப்படியான மதிப்பீடு, சந்தை விழும் என்றார். அவர் சொல்லும்போது வீழ்ச்சியை கணிக்க முடியாதபடி வேகத்தில் சென்றுகொண்டிருந்தது. இப்போது அந்த நாளும் வந்துவிட்டது. வாகன உற்பத்தி தவிர பெரும்பாலான நிறுவனங்கள் கடந்த காலாண்டில் லாபமீட்டியிருக்கின்றன. ஆனாலும், சந்தை வீழ்ந்திருக்கிறது. ஊதியிருந்த வளர்ச்சியால் ஈர்க்கப்பட்ட சிறுமுதலீட்டாளர்கள் நொறுங்கிய வீழ்ச்சியால் வெளியேறியிருக்கிறார்கள். வீழ்ச்சி 16500 புள்ளிகள்வரை தொடரக்கூடும் என கணிக்கப்பட்டிருக்கிறது. பங்கு சந்தை முதலீடு சந்தை அபாயங்களுக்கு உட்பட்டது. ஒரே பாட்டில் மில்லியனராக அது ஒன்றும் விக்ரமன் படமல்ல.

மு.வி.நந்தினி
முகநூல் பதிவு