சிவகங்கை லாக்கப் படுகொலை! தமிழகத்தில் தலைவிரித்தாடும் போலீசு ராஜ்ஜியம்? கட்டுப்படுத்த கையாலாகாத திமுக அரசு!

சிவகங்கை மாவட்டம் திருப்புவனம் அருகே மடப்புரத்தில் பிரசித்தி பெற்ற பத்ரகாளியம்மன் கோயிலுக்கு காரில் வந்த மதுரை திருமங்கலம் பகுதியைச் சேர்ந்த மருத்துவர் நிகிதா மற்றும் அவரது தாயார் 10 பவுன் நகை காணாமல் போனதாக காவல் நிலையத்தில் புகார் அளித்தனர்.

அதைத் தொடர்ந்து, அந்தக் கோயிலில் காவலாளியாக பணிபுரிந்து வந்த அஜித்குமார் (வயது 27) மற்றும் அவரின் சகோதரர்கள் உள்ளிட்ட 5 பேரை காவல் நிலையத்தில் வைத்து போலீசார் விசாரித்துள்ளனர். விசாரணையின் போது, போலீசார் இரண்டு நாள் தொடர்ச்சியாக பல்வேறு இடங்களுக்கு கொண்டு சென்று அடித்து சித்திரவதை செய்ததன் காரணமாக வலி தாங்க முடியாமல் அஜித்குமார் உயிரிழந்துள்ளார்.

நடந்தது என்ன?

நேற்று முன்தினம் மதுரை மாவட்டம் திருமங்கலத்தைச் சேர்ந்த சிவகாமியும் அவர் மகள் மருத்துவர் நிகிதாவும் கோயிலுக்கு வந்துள்ளனர்.

காரில் வந்த சிவகாமிக்கு நடக்க முடியாததால், காவலாளி அஜித்குமார் சக்கர நாற்காலி எடுத்து வந்து உதவியுள்ளார். அப்போது நிகிதா, காரை ஓரமாக பார்க்கிங் செய்யும்படி அஜித்குமாரிடம் தெரிவிக்க, தனக்கு கார் ஓட்டத்தெரியாது என்று கூறி, அங்கிருந்த அவரது நண்பர்களிடம் காரை பார்க்கிங் செய்யச் சொல்லுங்கள் என்று அஜித்குமார் கூறியுள்ளார்.

காரை பார்க்கிங் செய்ய கொண்டு சென்ற அவரது நண்பர்கள் சிறிது நேரம் கழித்து தான் பார்க்கிங் செய்தார்கள் என்பதை வைத்துக் கொண்டு காரின் பின்பக்க சீட்டில் வைத்திருந்த 10 பவுன் நகையை அஜித்குமார் மற்றும் அவரது நண்பர்கள் தான் திருடி விட்டார்கள் என்று மருத்துவர் நிகிதா போலீசில் புகார் செய்துள்ளார்.

நகை திருடப்பட்டதாக புகார் கொடுத்துள்ள திருமங்கலம் பகுதியைச் சேர்ந்த மருத்துவர் நிகிதா சென்னையில் தலைமைச் செயலகத்தில் பணியாற்றுகின்ற உறவினர் ஒருவர் மூலமாக மாவட்ட காவல்துறை கண்காணிப்பாளருக்கு நெருக்கடி கொடுத்ததாக செய்திகள் வெளியாகியுள்ளது.

கோவிலுக்கு சென்றவர்கள் 10 பவுன் நகையை ஏன் கொண்டு சென்றார்கள்? அதனை ஏன் பெட்டிக்குள் வைத்திருந்தார்கள்? 10 பவுன் நகை இருந்த நிலையில் கார் சாவியை முன் பின் அறிமுகம் இல்லாதவர்களிடம் கொடுத்து ஏன் பார்க்கிங் செய்ய சொன்னார்கள்? என்பது படிக்கும் போதே சந்தேகத்தை உருவாக்குகிறது என்ற போதிலும், போலீசுக்கும் இந்த சந்தேகம் வரவே மீண்டும் ஒருமுறை அவர்களிடம் போனில் பேசி உறுதி செய்து கொண்ட பின்னரே பலவந்தமாக தாக்குதலில் ஈடுபட்டுள்ளனர் என்கிறார் கொலை செய்யப்பட்ட அஜித்குமாரின் சகோதரர் நவீன்.

திருட்டு உள்ளிட்ட வழக்குகளில் குற்றம் சுமத்தப்பட்டவர்கள் மீது வழக்கு பதிவு செய்து நீதிமன்றத்தில் ஒப்படைப்பது என்பதுதான் அவர்களே முன்வைக்கின்ற சட்டம் கூறுகின்ற வழிமுறை.

ஆனால் போலீசு வர்க்க ரீதியாக ஏழை, பணக்காரர்கள் என்பதை பார்த்து பணக்காரர்கள் முன்வைக்கின்ற குற்றச்சாட்டுகள் அத்தனையும் உண்மை என்பதைப் போலவே ஏற்றுக்கொள்கின்றனர்.

குற்றம் சுமத்தப்படுபவர்கள் ஏழையாகவும், கூலிகளாகவும் இருந்து விட்டால் கண்டிப்பாக அவர்கள் தவறு செய்வார்கள் என்பது போலீசின் பொதுப்புத்தியில் எப்போதும் நிரந்தரமாக பதிவாகியுள்ளது என்பதன் அடையாளம் தான் அஜித்குமார் மீது கொடூரமான மூன்றாம் தர வகையிலான தாக்குதல்கள் நடத்தி உண்மையை ஒத்துக் கொள்ள வைத்த கேடுகெட்ட வழிமுறையாகும். போலீசு அதிகாரத்தை கையில் எடுத்துக்கொண்டு கொடூரமாக தாக்கியதன் விளைவு அஜித்குமார் கொலை செய்யப்பட்டுள்ளார்.

இது மட்டுமல்ல! திமுக ஆட்சியில் கைது செய்யப்படுபவர்கள் மீது போலீசின் விதிகளில் உள்ளபடி சட்டத்தின் படி நடத்தப்படுவதில்லை. மாறாக தப்பியோட முயற்சித்தார்கள் எனவே குறைந்தபட்ச பலப்பிரயோகத்தை பயன்படுத்தினோம் என்று எஃப்ஐஆர் பதிவு செய்துவிட்டு, அதிகபட்சமாக இரும்புத் தடியை பயன்படுத்தி தாக்குதல்களை தொடுப்பது, கை, கால்களை முறித்து போட்டுவிட்டு பாத்ரூம்களில் வழுக்கி விழுந்தார்கள் என்று அப்பட்டமாக புளுகுவது போன்றவை அம்பலமாகி நாறிய பிறகும் போலீசு இன்னமும் திருந்த வில்லை. திமுக ஆட்சிக்கு வந்த பிறகு 24 பேர் லாக்கப் படுகொலையில் பலியாகியுள்ளனர்.

திமுக ஆட்சியில் போலீசு ராஜ்ஜியம் தலைவிரித்தாடிக் கொண்டிருக்கிறது என்பதற்கு மற்றொரு எடுத்துக்காட்டாக கடந்த சில ஆண்டுகளில் மட்டும் 19 என்கவுண்டரில் 21 பேர் கொல்லப்பட்டதாகவும், கைது செய்தபின்பு குற்றவாளிகளை காவல்துறையினர் சுட்டுக்கொல்வது அதிகரிப்பதாகவும்” பல்வேறு அமைப்புகள், மனித உரிமை செயல்பாட்டாளர்கள் 75 பேர் கையெழுத்திட்டு கூட்டறிக்கை வெளியிட்டனர்.

இந்த வகையில் கைது செய்வதற்காக சுட்டு பிடிப்பது; கைது செய்யப்பட்ட பிறகு சுட்டு பொசுக்குவது போன்ற வழிமுறைகளில் திமுக ஆட்சியின் கீழ் தமிழக போலீசு தறிக்கெட்டுப் போயுள்ளது.

படிக்க:

♦ லாக்கப் மரணம் – காவல்துறையின் அதிகாரத்திமிர்!

♦ திருப்புவனம் –காவலாளி அஜீத் குமார் அடித்துப் படுகொலை! தமிழ்நாடு போலிசு படு அட்டூழியம்!

பொதுவாக, “சட்டம் அதன் கடமையை செய்கிறது” என்பது தான் திமுகவின் தாரக மந்திரம். அது கிடைக்கட்டும். ஆனால் அந்த சட்டம் ஏழைகளின் மீது மட்டும் ஏன் மூர்க்கமாக, வெறி பிடித்த நாய் போல பாய்கிறது என்பதே கேள்வி.

சமீபத்தில் ஸ்ரீவில்லிபுத்தூர் மாரியம்மன் கோவிலில் குத்தாட்டம் போட்ட பார்ப்பன அர்ச்சகர்கள் மீது இது போன்ற லத்திக்கம்புகள் பாயவில்லையே. பெண்களின் மீது விபூதி அடிப்பதும், ஆபாச நடனமாக ஆடி அதையும் வீடியோ எடுத்து வெளியில் போட்டதையும் கண்ட பிறகும் போலீசின் சட்டம், அங்கு ஒழுங்கு செய்ய ஒரு கூந்தலையும் புடுங்கவில்லையே ஏன்?

இதுதான் தமிழகத்தில் திமுக ஆட்சியின் கீழ் உள்ள போலீசின் தற்போதைய அராஜகமான செயல்பாடுகளின் சுருக்கமான நிலைமை.

பொதுவாக இது போன்ற லாக்கப் மரணங்களை நிகழ்த்திவிட்டு அம்பலமானவுடன் அந்த குடும்பத்துடன் பேச்சு வார்த்தை நடத்தி சில ஆயிரங்கள் அல்லது லட்சங்கள் நஷ்ட ஈடாக வழங்குவது; வீட்டில் ஒருவருக்கு வேலை தருகிறோம் என்று ஆசை காட்டுவது போன்ற வழிமுறைகள் மேல் மூலம் ஏழ்மையின் மீது வேறொரு வகையிலான கொடூரமான தாக்குதலை நடத்தி போலீசு தப்பித்துக் கொள்கிறது.

தொடர்ச்சியாக அன்றாடம் ஒவ்வொரு காவல் நிலையத்திலும் இதுபோன்ற சம்பவங்கள், சட்டம் ஒழுங்கு பாதுகாக்கிறோம் என்ற பெயரில் நடத்துகின்ற போலீஸ் நடத்துகின்ற அடாவடித்தனங்கள், அதிக்கிரமங்கள் ஆகியவை வெளியே தெரிவதில்லை.

அதிமுக ஆட்சியில் சாத்தான்குளம் போல திமுக ஆட்சியில் 24 பேர் லாக்கப் படுகொலை செய்யப்பட்டுள்ளனர் என்பது தற்போது அம்பலமாகி திமுகவின் முகத்திரையை கிழித்தெறிந்து உள்ளது.

சிவகங்கை லாக்கப் படுகொலைக்கு காரணமான அனைத்து போலீஸ் துறையினரையும் கைது செய்! பணிநீக்கம் செய்! கொலையான அஜித் குமார் குடும்பத்திற்கு உரிய நஷ்ட ஈடு தொகையை போலீஸ் துறையிடம் அதிலும் குறிப்பாக இந்த கொடூரமான தாக்குதல்களை நடத்திய போலீசாரிடம் வசூல் செய்து கொடு என்று போராடுவோம்.

◾கணேசன்.

நன்றி: புதிய ஜனநாயகம் தினசரி