இலங்கையிலிருந்து மீள் குடியமர்த்தப்பட்ட தமிழர்களின் வாக்குரிமை பறிபோகும் அபாயம்!

சிறப்புத் தீவிர வாக்காளர் பட்டியல் திருத்தம்!
இலங்கையிலிருந்து மீள் குடியமர்த்தப்பட்ட தமிழர்களின் வாக்குரிமை பறிபோகும் அபாயம்!

பிரிட்டன் காலனி ஆதிக்கத்தின் போது இந்தியாவில் இருந்து குறிப்பாக தென்னிந்திய பகுதிகளில் இருந்த தமிழ் பேசும் மக்கள் உலகம் முழுவதும் கூலி அடிமைகளாக அதாவது தோட்டத் தொழிலாளர்களாக கொண்டு செல்லப்பட்டனர்.

இவ்வாறு இலங்கையில் உள்ள மலையகப்பகுதியில் தோட்ட தொழிலாளர்களாக கொண்டு செல்லப்பட்டு குடியமர்த்தப்பட்ட தமிழர்கள் இலங்கையிலிருந்து படிப்படியாக தமிழகத்திற்கு திருப்பி அனுப்பப்பட்டனர்.

குறிப்பாக, 1964-ஆம் ஆண்டு சிறிமாவோ – லால் பகதூர் சாஸ்திரி உடன்படிக்கை மற்றும் 1974-ஆம் ஆண்டு சிறிமாவோ – இந்திராகாந்தி உடன்படிக்கை ஆகியவற்றின் கீழ் இலங்கையிலிருந்து தமிழகம் திரும்பிய இந்திய வம்சாவளித் தமிழர்கள் தமிழகத்தில் பல்வேறு பகுதிகளில் தனி குடியிருப்புகளில் தங்க வைக்கப்பட்டனர். இவ்வாறு தங்க வைக்கப்பட்ட குடியிருப்புகள் சிலோன் கோட்ரஸ் என்று அழைக்கப்பட்டது.

இவ்வாறு தாயகம் திரும்பிய இந்திய வம்சாவளி தமிழர்கள் ஏறக்குறைய இரண்டு தலைமுறையாக இந்தியாவின் பல பகுதிகளில் குறிப்பாக தமிழகத்தில் பல்வேறு மாவட்டங்களில் வாழ்ந்து வருகின்றனர்.

இவர்கள் ஈழத் தமிழர்கள் கிடையாது மாறாக இந்திய தமிழர்கள் தனது வேலைக்காக நாடு கடத்தப்பட்டு அல்லது கட்டாய உழைப்பிற்காக இலங்கை உள்ளிட்ட பல்வேறு நாடுகளுக்கு கொண்டு செல்லப்பட்டவர்கள். அதில் ஒரு பகுதியினர் திரும்பி வந்துள்ளனர் என்பதால் அவர்கள் இந்த மண்ணின் பூர்வ குடிமக்கள் என்பது தான் மறைக்க முடியாத வரலாறு ஆகும்.

இந்தத் தீவிர வாக்காளர் பட்டியல் திருத்தத்தால் பெரும் பாதிப்புக்கு உள்ளாவர் எனத் தெரிகிறது என்கிறார் இலங்கை பேராதனை பல்கலைக்கழகத்தில் பணிபுரிந்து ஓய்வு பெற்ற உதவி பேராசிரியர் ஜெய் சிங்.

இலங்கை – இந்திய உடன்படிக்கையின் பின்னணி இலங்கையில் 1948, 1949-ஆம் ஆண்டுகளில் கொண்டுவரப்பட்ட குடியுரிமைத் திருத்தச் சட்டம் காரணமாக, 150 ஆண்டுகளாக இலங்கையில் வாழ்ந்த இந்திய வம்சாவளி மலையகத் தமிழர்கள் 10 லட்சத்துக்கும் மேலானோர், வாக்குரிமையுடன் குடியுரிமையையும் இழந்து நாடற்றவர்களாயினர்.

இன்றைய இந்தியத் தேர்தல் ஆணையம் போன்றே, அன்றைக்கு இலங்கைத் தேர்தல் ஆணையமும் கல்வி அறிவு மிகவும் குறைந்த தோட்டத் தொழிலாளர்களிடம், அவர்களின் வாக்குரிமைக்காகப் பிறப்புச் சான்றிதழ், இருப்பிட முகவரி, மூதாதையர் விவரம் ஆகிய வற்றைக் கேட்க, அதனைச் சமர்ப்பிக்க முடியாத நிலையில் 9,75,000 பேர் நாடற்றவர்களாக்கப்பட்டனர்.

இதன் பின்னரே இலங்கை – இந்திய உடன்படிக்கை ஏற்பட்டு, 6 லட்சம் இந்திய வம்சாவளியினரை இந்தியா ஏற்பதென முடிவானது என்று இந்த இலங்கை தமிழ் வம்சாவளியினரின் வரலாற்றை சுருக்கமாக முன் வைக்கிறார் ஜெய்சிங்.

மேற்கண்ட ஒப்பந்தங்களின் அடிப்படையில் சுமார் ஒரு லட்சம் குடும்பத்தைச் சார்ந்த 4 லட்சத்து 61 ஆயிரம் பேர் மட்டுமே 1984 வரை இந்தியாவிற்கு திரும்பி வந்துள்ளனர். இவ்வாறு திரும்பிய மக்களும் இந்தியாவில் குறிப்பாக மலைப் பகுதிகளிலேயே குடியமர்த்தப்பட்டனர் என்பது குறிப்பிடத்தக்கது. கடந்த 50 ஆண்டுகளில் அவர்களின் எண்ணிக்கை சுமார் 20 லட்சம் இருக்க வாய்ப்புள்ளது.

இம்மக்கள் நீலகிரி, வால்பாறை, கொடைக்கானல், உதகை போன்ற மேட்டுப் பகுதிகளிலும், திருநெல்வேலி, மதுரை, தேனி போன்ற தமிழ்நாட்டின் மற்ற மாவட்டங்களிலும் பரவலாக வாழ்ந்து வருகின்றனர். உடன்படிக்கையின் கீழ் இங்கு வந்த அனைத்து மக்களும் “இந்தியப் பிரஜை” என்ற அங்கீகாரத்துடனேயே இந்தியாவிற்குள் வந்தனர் என்பதைக் கூர்ந்து கவனித்தல் அவசியம். தாயகம் திரும்பியோர் கடந்த 50 வருடங்களாகச் சட்டப்படி அனைத்து உரிமைகளுடன் இந்தியப் பிரஜைகளாக வாழ்ந்து வருகின்றனர். இவர்கள் இந்தியப் பிரஜைகள் என்ற அங்கீகாரத்துடன் இந்திய நாட்டிற்கு வந்து வாக்காளர்களாகி, 2024-ஆம் ஆண்டு நாடாளுமன்றத் தேர்தல் வரை, அனைத்து வகையான தேர்தல்களிலும் தங்களின் வாக்குரிமையைப் பயன்படுத்தி வந்துள்ளனர்.

இந்நிலையில் தற்போது நடைபெற்று வரும் தேர்தல் ஆணையத்தின் தீவிர வாக்காளர் திருத்தம், தாயகம் திரும்பியுள்ள இம்மக்களின் வாக்குரிமையைப் பறித்து, குடியுரிமையையும் கேள்விக்குறியாக்கி விடுமோ என்ற அச்சம் அவர்களிடம் எழத் தொடங்கி உள்ளது.

வழக்கமாக வாக்காளர் பட்டியல் திருத்தம் அல்லது தீவிர சிறப்பு வாக்காளர் திருத்தம் போன்றவைகளில் ஏற்கனவே வாக்களித்த மக்களின் ஆவணங்கள் சரிபார்க்கப்பட்டு அவர்கள் மீண்டும் வாக்களிக்க தகுதி உள்ளவர்களாக தீர்மானிக்கப்படுவார்கள்.

ஆனால் தற்போது ஆர்எஸ்எஸ் பாஜக இந்திய ஒன்றிய அரசாங்கம் கொண்டு வந்துள்ள இந்த தீவிர திருத்தமானது 2002 காலகட்டத்தில் யார் யாரெல்லாம் வாக்களித்தார்களோ அவர்களின் உறவினர்கள் என்ற ஒரு புதிய அம்சத்தை சேர்த்துள்ளதால் இந்த மக்கள் 2002 ஆம் ஆண்டு வாக்களித்தனர் என்பதெல்லாம் ஆவணப்படி உள்ளதா என்பதெல்லாம் கேள்வி குறிதான்.

படிக்க: 

♦ இலங்கை போராட்டம்: தமிழினவாதிகளின் வெற்றுக் கூச்சல்!

♦ ஈழத்தமிழர்களுக்கு இரட்டை குடியுரிமையை உடனே வழங்கு!

“இத்தகைய அபாயத்தை உள்ளடக்கிய இந்த சிறப்பு தீவிர வாக்கு திருத்தத்தின் காரணமாக அவர்கள் புதிய வழிமுறைகளுக்குள் தள்ளப்பட்டு, வாக்குரிமை இழக்கும் சூழ்நிலை உருவாகியுள்ளது. பிறப்புச் சான்றிதழ் இல்லாமை: பிறப்புச் சான்றிதழ் இல்லாத ஒரு பகுதியினரும் தமிழகம் வந்துள்ளனர். புதிய விதிமுறைகளால் அவர்களும் வாக்குரிமை இழக்க நேரிடும். மேலும், இலங்கையின் பிறப்புச் சான்றிதழை இந்தியத் தேர்தல் ஆணையம் ஏற்குமா அல்லது அதனை இந்தியக் குடிவரவுத் துறையை அணுகி உறுதிப்படுத்துவதில் சிரமங்கள் ஏற்படுமா என்றும் தெரியவில்லை” என்று வாக்குரிமை பறிக்கப்படும் அபாயத்தை பற்றி முன்வைக்கின்றார் உதவி பேராசிரியரான ஜெய் சிங்.

ஈழத்தில் விடுதலைப் போராட்டம் துவங்கிய காலத்தில் இருந்து ஈழத் தமிழர்கள் அடைகின்ற துன்பங்கள் உலக வரலாற்றிலேயே வேறு எந்த நாட்டிலும் அனுபவிக்காத கொடுமை என்று தான் சொல்ல முடியும். தற்போதுள்ள தலைமுறையினருக்கு இந்த வரலாறு புரியவில்லை என்று சொன்னால் சமகாலத்தில் பாலஸ்தீனத்தில் இஸ்ரேலின் தாக்குதலுக்கு பலியாகி தனது இன்னுயிரை இழந்த லட்சக்கணக்கான மக்களின் வாழ்க்கையை பார்த்தால் இந்த அவலத்தை நாம் புரிந்து கொள்ள முடியும்.

ஈழத்தில் தனிநாடு கோரி விடுதலைப் போராட்டம் துவங்கிய காலத்திற்குப் பிறகு இந்தியாவிற்கு வந்தவர்கள் முறையான அனுமதியின்றி இங்கேயே தங்கி இருக்கிறார்கள் என்று அவர்களை இழிவு படுத்துகிறார்கள். அவர்களை இன்னமும் இந்த நாட்டின் பிரஜைகளாக ஏற்றுக் கொள்வதில் இந்திய ஒன்றிய அரசு எந்த விதமான கருணையும் காட்டவில்லை.

படிப்படியாக இலங்கையிலிருந்து இந்தியாவிற்கு குடியமர்த்தப்பட்ட இந்த மக்களை அகதிகள் முகாம்களில் தங்க வைத்து தினமும் அவர்களை சித்திரவதை செய்வதை போல செய்து வருகின்றனர். இந்தியாவில் உள்ள ஒடுக்கப்பட்ட மக்களின் வாழ்க்கையை விட அகதி முகாம்களில் வாழ்கின்ற ஈழத் தமிழர்களின் வாழ்க்கை பல மடங்கு கொடூரமான அடக்குமுறைகள் மற்றும் ஏழ்மை, வறுமை ஆகியவற்றை உள்ளடக்கியது.

அவர்களுக்கும் சேர்த்து போராட வேண்டிய காலகட்டத்தில் தான் இன்று ஈழத்தமிழர்கள் பிரச்சனை உள்ளது.

எனவே ஏற்கனவே இந்தியாவிலிருந்து இலங்கைக்குச் சென்று மீள் குடியமர்த்தப்பட்ட மக்களுக்கு அவர்களின் வாக்குரிமை, குடியுரிமை உள்ளிட்ட அனைத்து விதமான உரிமைகளையும் வழங்க வேண்டும் என்றும், ஈழப் போராட்டத்தினால் இந்தியாவிற்கு குடியேறிய அகதிகள் என்று முத்திரை குத்தப்பட்டு முகாம்களில் அடைத்து வைக்கப்பட்டுள்ள ஈழத் தமிழர்கள் சுதந்திரமாக வாழ்வதற்கு அங்கீகரிக்கின்ற வகையில் இரட்டை குடியுரிமை வழங்க வேண்டும் என்பதை முன்னிறுத்தி போராடுவோம்.

ஈழத் தமிழர்களின் பிரச்சனையை முன்வைத்து அதனை தீர்வு காண்பதற்கு போராடுவது என்பதை காட்டிலும், மாவீரர் தினம் என்பதை முன்வைத்து கல்லா கட்டுவதற்கு தயாராக உள்ள தமிழனப் பிழைப்பு வாதிகளின் முகத்திரையை கிழித்தெறிவோம்.

◾தமிழ்ச்செல்வன்.