சத்துணவு ஊழியருக்குத் தீண்டாமை: குற்றவாளிகள் அனைவரையும் தண்டிக்க போராடுவோம்!

அவிநாசி அருகே 2018 ஆம் ஆண்டு அரசு பள்ளியில் பட்டியலினத்தைச் சேர்ந்த பாப்பாள் என்ற சத்துணவு ஊழியர், மாணவர்களுக்கு உணவு சமைப்பதற்கு எதிராக தீண்டாமை குற்றத்தில் ஈடுபட்ட சாதி வெறியர்களுக்கு ஏழு ஆண்டுகள் கழித்து தண்டனை வழங்கப்பட்டுள்ளது.

திருப்பூர் மாவட்டம் திருமலை கவுண்டன்பாளையம் அரசு உயர்நிலைப் பள்ளியில் சமையலராக பணியாற்றி வந்தவர் பட்டியல் சமூகத்தைச் சேர்ந்த பாப்பாள். இவர் பட்டியல் சமூகத்தைச் சேர்ந்தவர் என்பதால் கடந்த 2018 ஆம் ஆண்டு ஜூலை மாதம் இப்பள்ளியில் படிக்கும் ஆதிக்க சாதிவெறி பெற்றோர்கள் பாப்பாளை சமைக்க விடாமல் தடுத்து நிறுத்தியதோடு பள்ளி வளாகத்தை பூட்டு போட்டு சாதி ஆதிக்க வெறியை காண்பித்தனர்

பாதிக்கப்பட்ட சத்துணவு ஊழியரான பாப்பாளுக்கு சொந்த ஊரே திருமலை கவுண்டர் பாளையம் தான். 12 வருடமாக சத்துணவு ஊழியராக பணியாற்றி வந்த பாப்பாள் தனது சொந்த ஊருக்கு பணி மாறுதல் கிடைத்த மகிழ்ச்சியில் மாணவர்களுக்கு உணவு சமைக்க வந்தவருக்கு காத்திருந்தது அதிர்ச்சி.  “சமையல் கூடத்திற்குள் நுழைந்ததுமே சாதிப் பெயரைச் சொல்லி உனக்கு அரசாங்க வேலை ஒரு கேடா என காது கூச வார்த்தைகளாள் நோகடிச்சு, என்னை அந்த சமையல் கூடத்தில் இருந்து வெளியே போக சொன்னார்கள். டீச்சருங்க கிட்ட போய் இவ இங்க இருந்தா எங்க குழந்தைகளை ஸ்கூலுக்கு அனுப்ப மாட்டோம்னு மிரட்டுனாங்க” என்று பிபிசி தமிழுக்கு அளித்த பேட்டியில் தெரிவித்து இருந்தார் பாப்பாள்.

இதனை விசாரித்து சமையல் ஊழியர் பாப்பாளுக்கு நீதி வழங்க வேண்டிய அதிகாரிகளோ, பாப்பாளின் டிரான்ஸ்பரை ரத்து செய்துவிட்டு மீண்டும் ஒச்சாம்பாளையம் பள்ளிக்கு போக சொல்லி இருக்காங்க. அதாவது சாதி வெறியர்களின் கருத்துக்கு இணங்கி, பள்ளியின் தலைமை ஆசிரியை சசிகலா, வட்டார வளர்ச்சி அலுவலர் மீனாட்சி உள்ளிட்டோரின் தலையீட்டால் பாப்பாள் பணி மாறுதல் ரத்து செய்யப்பட்டது

இதன்பின்பு தீண்டாமை ஒழிப்பு முன்னணி, ஆதித்தமிழர் பேரவை, பெரியார் உணர்வாளர்கள் கூட்டமைப்பு ஆகிய அமைப்புகளின் போராட்டங்களால் சத்துணவு பணியாளரை பணி செய்ய விடாமல் தடுத்த பழனிச்சாமி, சுப்பிரமணி, ராஜாமணி, மணியாள், வேலூர் சக்திவேல், சின்னத்தம்பி, சண்முகம், டிராக்டர் காரர் மற்றும் வட்டார வளர்ச்சி அலுவலர் மீனாட்சி என 36 பேர் மீது வன்கொடுமை சட்டம் மற்றும் பிற பிரிவுகளின் கீழ் சேவூர் காவல் நிலையத்தில் வழக்கு பதிவு செய்யப்பட்டது

ஏழு ஆண்டுகள் நடைபெற்று வந்த வழக்கில் 25 பேரை விடுவித்தும் பெண் உட்பட ஆறு பேரை குற்றவாளி எனவும் திருப்பூர் மாவட்ட வன்கொடுமை தடுப்பு சிறப்பு நீதிமன்றம் நேற்று தீர்ப்பளித்துள்ளது. ஆறு பேருக்கு தலா இரண்டு ஆண்டு சிறை தண்டனையும் ரூ.5,000 அபராதம் தண்டனையாக வழங்கப்பட்டுள்ளது 2024 ஆம் ஆண்டு வரை மந்தமாக நடந்து வந்த வழக்கு போராட்டங்க்களுக்கு பிறகு வேகம் எடுத்தது.

இந்த வழக்கை பொறுத்தமட்டில் நேரடி குற்றவாளியாக ஆதிக்க சாதியினர் பார்க்கப்பட்டாலும் வட்டார வளர்ச்சி அலுவலர் மீனாட்சி மற்றும் காவல்துறையினர் இதற்கு உறுதுணையாக இருந்துள்ளனர். அரசு அதிகாரிகள் மட்டத்தில் சாதி ஆதிக்க மனநிலை கொண்டவர்களிடம் புரையோடிப் போயிருப்பதே இந்த சம்பவம் நமக்கு காட்டுகிறது. அதன் காரணமாக திருப்பூர் உள்ளிட்ட கொங்கு மண்டல பகுதிகளில் அதிக அளவில் சாதி கொடுமைகளும், தீண்டாமை குற்றங்களும் நடைபெற்று வருகின்றன.

படிக்க:

♦ கருவறை தீண்டாமைக்கு நீதிமன்ற அங்கீகாரமா? – கருத்தரங்கம்

♦ சங்கி ரவி அவர்களே! மதச்சார்பின்மை வேண்டாம்! சாதி- தீண்டாமைதான் வேண்டுமா? 

இதுகுறித்து பாப்பாள் தரப்பில் ஆஜரான மூத்த வழக்கறிஞர் ப.பா மோகன் செய்தியாளரிடம் பேசுகையில் “ஒரு அரசு பணியாளரான பாப்பாளை பட்டியலின சமூகத்தினர் என்பதற்காகவே சமைக்க கூடாது என்று திட்டமிட்டு, ஆதிக்க சாதியினர் தடுத்துள்ளனர். இது முழுக்க முழுக்க அப்பட்டமான வன்கொடுமையாகும். அப்போதைய அவிநாசி வட்டார வளர்ச்சி அலுவலர் மீனாட்சி மற்றும் காவல்துறையினர் உடந்தையாக இருந்துள்ளனர். 36-வது குற்றவாளியான மீனாட்சியை இந்த வழக்கில் இருந்து உயர்நீதிமன்றம் விடுவித்தது.

இந்த வழக்கை காவல் துணைக் கண்காணிப்பாளர் பதவி நிலையிலான அதிகாரிகள்தான் விசாரிக்க வேண்டும். அதிலும், அவர் வன்கொடுமை தடுப்புச் சட்டம் குறித்த நுட்பமும், அறிவும் கொண்டிருக்க வேண்டும் என்று சட்டத்தில் உள்ளது. ஆனால், பாப்பாள் வழக்கில் இந்த விதிகள் முறையாகக் கடைப்பிடிக்கவில்லை. அதனால், இந்த வழக்கு முறையாக விசாரிக்கப்படவில்லை.

இந்த வழக்கில் தொடர் விசாரணை கோரி, நீதிமன்றத்தில் மனு அளித்தோம். மனு அளித்த அன்றைய தினமே எங்களது மனு தள்ளுபடி செய்யப்பட்டது. விசாரணையின்போது, ஆசிரியர்கள் பலர் பிறழ்சாட்சியாக மாறினர். இருப்பினும், சிறப்பு வழக்கறிஞர் பாண்டியன் வைத்த வாதங்களை முன்வைத்து நீதிமன்றம் 6 பேருக்கு தண்டனை விதித்து தீர்ப்பளித்துள்ளது.

இதில், சட்டவிரோதமாக கூடுதல், சட்டவிரோதமாக ஒருவரைத் தடுத்து நிறுத்துதல், வன்கொடுமை தடுப்புச் சட்டம், சமூக ரீதியாக தொல்லை கொடுத்தது என்ற பிரிவுகளின்கீழ் தண்டனை விதிக்கப்பட்டுள்ளது.

இந்தத் தீர்ப்பில் பாதிக்கப்பட்ட பாப்பாளுக்கும், எங்களுக்கும் திருப்தி இல்லை. இதுதொடர்பாக உயர் நீதிமன்றத்தில் மேல்முறையீடு செய்யவுள்ளோம்” என்றார்.

தீண்டாமை குற்றத்திற்கு அரசின் அதிகார மட்டங்களில் அமர்ந்திருப்பவர்களுக்கு இருக்கும் சாதி ஆதிக்க கண்ணோட்டமே குற்றவாளிகளை பாதுகாக்கிறது. ‘நம்மாளு தான்பா அதிகாரியா இருக்கான், அவன் பாத்துப்பான்’, ‘நம்ம சாதிகாரன் தான் எம்.எல்.ஏ., எம்.பியா இருக்காரு நமக்கு எதுவும் பிரச்சினை இல்லை’ என்ற ஆதிக்க சாதி திமிர் தான் என்ன வேணும்னாலும் செய்யலாம் என்ற அகந்தையை தோற்றுவிக்கிறது.

தமிழ்நாட்டிலேயே இதுதான் நிலைமையென்றால் பின்தங்கிய பல மாநிலங்களில் இதுபோன்ற விசயங்களே வெளியில் வராமல் ஊத்தி மூடிவிடுவார்கள். தீண்டாமை ஒழிக்கப்பட்டுவிட்டதாக இந்திய அரசியலமைப்பு சட்டம் சொல்கிறது. ஆனால் தீண்டாமை பலநூறு ஆண்டுகளாய் தலைவிரித்தாடுகிறது. இது தமிழகத்திற்கு மிகப்பெரிய தலைகுனிவு.

தீண்டாமை சுவர், பட்டியலின மக்கள் குடிக்கும் தண்ணீரில் மலம் கலப்பது, ஊராட்சி மன்ற தலைவர் தாழ்த்தப்பட்ட சமூகமாக இருந்தால் அவரை அவமதிப்பது, பள்ளி மாணவர்களிடையே நடக்கும் சாதி மோதல், சாதி ஆணவப்படுகொலைகள் என திமுக ஆட்சியில் தமிழ்நாட்டில் சாதிவெறி தலைவிரித்தாடுகிறது. இதனை எதிர்த்து ஒன்றிணைந்த மக்கள் போராட்டங்கள் அவசியமாயுள்ளது.

சத்துணவு ஊழியர் பாப்பாள் மீது நடத்தப்பட்ட சாதிய தாக்குதலை எதிர்த்து களத்தில் போராடிய தீண்டாமை ஒழிப்பு முன்னணி, ஆதி தமிழர் பேரவை, பெரியார் உணர்வாளர்கள் கூட்டமைப்பு உள்ளிட்ட முற்போக்கு ஜனநாயக சக்திகளுக்கு மக்கள் அதிகாரம் சார்பாக பாராட்டுக்களைத் தெரிவிக்கிறோம். இவர்களின் இடைவிடாத 7 ஆண்டுகால போராட்டத்தினால் தான் இந்த தீர்ப்பை பெற முடிந்துள்ளது.

சாதி தீண்டாமை பல்வேறு வழிகளில் உழைக்கும் வர்க்கத்தின் மீது ஏவப்படுகிறது. அதிகாரத்தில் இருக்கின்ற ஆர்.எஸ்.எஸ் பாஜக பார்ப்பன சக்திகள் சாதி, மதவெறியை ஊட்டி வளர்க்க பல்வேறு கிளை அமைப்புகளை உருவாக்கி செயல்படுகின்றன. தமிழ்நாட்டை ஆளும் திமுக அரசு கார்ப்பரேட் நலனில் அக்கறை காட்டும் அளவுக்கு சாதிவெறி அமைப்புகளை தடைசெய்யவோ அவர்கள் மீது நடவடிக்கை எடுக்கவோ துணிவதில்லை. தமிழக அரசு பாப்பாள் வழக்கில் துரிதமாக செயல்பட்டிருந்தால் குற்றவாளி அனைவருக்கும் சரியான தண்டனை கிடைத்திருக்கும்.

• சுவாதி