அமெரிக்க டாலர் பல ஆண்டுகளாக சர்வதேச வர்த்தகத்திற்கான அதிகாரப்பூர்வ நாணயமாக இருந்து வருகிறது. இருப்பினும், சமீப காலங்களில் அமெரிக்க மேலாதிக்கத்திற்கு எதிராக டாலரைப் பின்னுக்குத் தள்ளும் முயற்சியில் புதிய நாணயத்தை உருவாக்குவது பற்றி பரவலாக பேசப்படுகிறது.
குறிப்பாக கடந்த பிப்ரவரியில் ரஷ்யா-உக்ரைன் போர் தொடங்கிய பிறகு, இந்த டாலர் பயன்பாட்டை குறைக்கும் யோசனைகள் சமீப காலங்களில் ஒரு உத்வேகத்தை பெற்றுள்ளது. கடந்த வாரம் ஸ்டேட் டூமாவின் துணைத் தலைவரான அலெக்சாண்டர் பாபகோவ் “டாலர் அல்லது யூரோவை சார்ந்திருக்கப்போவதில்லை”என்ற யுக்தியின் அடிப்படையில் பிரிக்ஸ் நாடுகள் தங்களுக்கிடையேயான பரிவர்த்தனைகளில் டாலரை தவிர்த்து பணம் செலுத்துவதற்கான புதிய வழிமுறைகளை உருவாக்கும் பணியில் ஈடுபட்டுள்ளதை குறிப்பிட்டதிலிருந்து இந்த இயக்கம் மேலும் உத்வேகத்தைப் பெற்றுள்ளது.
நாணயத்தின் ராஜாவை அகற்றுவது
அமெரிக்க டாலர் நாணயத்தின் ராஜா என்று அழைக்கப்படுகிறது. இது 1944 இல் உலகின் அதிகாரப்பூர்வ இருப்பு நாணயமாக மாறியது. பிரிட்டன் WOOTS ஒப்பந்தம் என்று அழைக்கப்படும் 44 நட்பு நாடுகளின் பிரதிநிதிகள் குழுவால் இந்த முடிவு எடுக்கப்பட்டது.
அப்போதிருந்து, டாலர் உலகில் ஒரு சக்திவாய்ந்த நிலையை அனுபவித்து வருகிறது. இது மற்ற பொருளாதாரங்கள் மீது அமெரிக்காவிற்கு விகிதாச்சார செல்வாக்கை கொடுத்துள்ளது. உண்மையில், வெளிநாட்டுக் கொள்கை இலக்குகளை அடைவதற்கான ஒரு கருவியாக அமெரிக்கா நீண்ட காலமாக பொருளாதாரத் தடைகளை விதித்துள்ளது.
இருப்பினும், எல்லோரும் அமெரிக்க விதிகளின்படி விளையாடுவதை விரும்புவதில்லை. ரஷ்யா மற்றும் சீனா போன்ற நாடுகள் டாலர் மேலாதிக்கத்தை நிறுத்த விரும்புகின்றன . இந்த செயல்முறை டி-டாலரைசேஷன் என்று அழைக்கப்படுகிறது – மேலும் இது உலகளாவிய சந்தைகளில் டாலரின் ஆதிக்கத்தைக் குறைப்பதைக் குறிக்கிறது. இது எண்ணெய் அல்லது பிற பொருட்களை வர்த்தகம் செய்ய பயன்படுத்தப்படும் நாணயமாக அமெரிக்க டாலரை மாற்றி புதிய பொது பணத்தை பயன்பாட்டுக்கு கொண்டு வரும் செயல்முறையாகும்.
இந்த செயல்முறையானது அமெரிக்க டாலர் மற்றும் அமெரிக்கப் பொருளாதாரத்தின் மீது மற்ற நாடுகளின் சார்புநிலையைக் குறைக்கும், இது அமெரிக்க பொருளாதார மற்றும் அரசியல் மாற்றங்களின் தாக்கத்தை அவர்களின் சொந்தப் பொருளாதாரங்களில் குறைக்க உதவும் என்று டீ-டாலரைசேஷன் ஆதரவாளர்கள் கூறுகின்றனர். மேலும், நாடுகள் டாலர் ஏற்ற இறக்கங்கள் மற்றும் வட்டி விகித மாற்றங்களால் வரும் விளைவுகளுக்கு ஆட்படுவதை குறைக்கலாம், இது பொருளாதார ஸ்திரத்தன்மையை மேம்படுத்தவும் நிதி நெருக்கடிகளின் அபாயத்தைக் குறைக்கவும் உதவும்.
இந்த நடவடிக்கை கடந்த சில ஆண்டுகளாக குறிப்பாக முந்தைய ஆண்டில் வேகம் பெற்று வருகிறது. 2022 ஆம் ஆண்டில், சர்வதேச நாணய நிதியம் வெளியிட்ட அறிக்கையில் பல்வேறு நாடுகளின் மத்திய வங்கிகள் அமெரிக்க டாலர் கையிருப்பை வெகுவாக குறைத்திருக்கின்றன என்று குறிப்பிடப்பட்டுள்ளது..
IMF இன் அதிகாரப்பூர்வ அந்நிய செலாவணி கையிருப்பு தரவுகளின் படி கடந்த ஆண்டின் இறுதி காலாண்டில் உலகளாவிய அந்நிய செலாவணி கையிருப்பில் டாலரின் பங்கு 59 சதவீதத்திற்கும் கீழே சரிந்தது, கடந்த இரண்டு தசாப்தங்களில் இதுவே அதிகபட்ச சரிவு என்று குறிப்பிடப்படுகிறது. வியக்கத்தக்க வகையில், டாலர் சரிவுக்கு பதிலாக நீண்ட காலமாக பரவலாக டாலருக்கு அடுத்து உலக நாடுகள் கையிருப்பில் வைத்திருக்கக் கூடிய இங்கிலாந்தின் பவுண்ட் ஸ்டெர்லிங், ஜப்பானின் யென் மற்றும் ஐரோப்பாவின் யூரோ ஆகிய நாணயங்களின் கையிருப்பு அதிகரிக்கப்படவில்லை. மாறாக, இரண்டு திசைகளில் டாலருக்கு மாற்றாக வேறு பணத்தின் கையிருப்புகள் அதிகரிக்கப்படுகிறது. அதில் நான்கில் ஒரு பங்கு சீன யுவான் ஆகவும் மற்ற மூன்று பங்கு இதற்கு முன்பு மிகவும் குறைவான அளவிலேயே கையிருப்பில் வைக்கப்பட்ட சிறிய நாடுகளின் கரன்சிகளின் கையிருப்பும் அதிகரிக்கப்பட்டுள்ளது.
உக்ரைன் மீதான ரஷ்யாவின் ஆக்கிரமிப்பிற்காக தண்டிக்க, மேற்கத்திய அரசாங்கங்கள் கடந்த ஆண்டு ரஷ்யாவின் 300 பில்லியன் டாலர் வெளிநாட்டு நாணய இருப்புக்களை முடக்கின, இது மொத்தத்தில் பாதியாக இருந்தது, மேலும் ரஷ்ய வங்கிகளை ஸ்விஃப்ட் சர்வதேச கொடுப்பனவு அமைப்பிலிருந்து வெளியேற்றியது .
முதலீட்டு தளமான பெஸ்டின்வெஸ்டின் நிர்வாக இயக்குனர் ஜேசன் ஹாலண்ட்ஸ் விளக்குவது போல், “டாலர் “ஆயுதமயமாக்கல்” என்று அழைக்கப்படுவது ரஷ்யாவை மட்டுமல்ல, பல நாடுகளையும் உலுக்கியுள்ளது.”
“இந்தியா மற்றும் சீனா போன்ற ரஷ்யாவுடன் தொடர்ந்து வர்த்தகம் செய்ய விரும்பும் நாடுகள், அதற்கு பதிலாக ரூபாய் மற்றும் யுவானில் அவ்வாறு செய்யத் தொடங்கியுள்ளன, சர்வதேச வர்த்தகத்தில் டாலரின் மதிப்பை குறைப்பது பற்றிய விவாதத்தை தூண்டுகின்றன.”
பிரேசிலும் சீனாவும் இப்போது யுவானில் பரஸ்பரம் வர்த்தகம் செய்து வருவதாகவும், சீன ரென்மின்பியை ( யுவான்) சர்வதேச நாணயமாகவும் டாலருக்கு சவாலாகவும் நிலைநிறுத்த உதவுகின்றன.
இந்தியாவும் டாலரை விட்டு விலக முயற்சி செய்து வருகிறது. சமீபத்தில், இங்கிலாந்து, ஜெர்மனி, ரஷ்யா மற்றும் ஐக்கிய அரபு எமிரேட்ஸ் உட்பட 18 நாடுகளுக்கு இந்திய ரூபாயில் வர்த்தகம் செய்ய அனுமதி வழங்கப்பட்டுள்ளது. பிப்ரவரியில், பிரபல பொருளாதார நிபுணர் நூரியல் ரூபினி , காலப்போக்கில் இந்திய ரூபாய் உலகின் உலகளாவிய இருப்பு நாணயங்களில் ஒன்றாக மாறக்கூடும் என்று கூறியிருந்தார்.
ET Now க்கு அளித்த பேட்டியில் , டாக்டர் டூம் என்ற புனைப்பெயர் கொண்ட பொருளாதார நிபுணர், “இந்தியா உலகின் பிற நாடுகளுடன் செய்யும் சில வர்த்தகங்களுக்கு, குறிப்பாக தெற்கு நாடுகளுக்கிடையேயான வர்த்தகத்தில் ஒரு பொது நாணயமாக மாறக்கூடும் என்பதை ஒருவர் பார்க்கலாம்.” என்று கூறுகிறார்.
“அது (இந்திய ரூபாய்) கணக்கின் யூனிட்டாக இருக்கலாம், பணம் செலுத்தும் வழிமுறையாக இருக்கலாம், மதிப்புக் கடையாக இருக்கலாம். நிச்சயமாக, இந்திய ரூபாய் காலப்போக்கில் உலகின் பல்வேறு உலகளாவிய இருப்பு நாணயங்களில் ஒன்றாக மாறக்கூடும். என்றும் குறிப்பிடுகிறார்.
BRICS நாணயம்
இதை முன்னோக்கி எடுத்துச் செல்ல, பிரேசில், ரஷ்யா, இந்தியா, சீனா மற்றும் தென்னாப்பிரிக்கா ஆகிய நாடுகளை உள்ளடக்கிய பிரிக்ஸ் கூட்டமைப்பும் வர்த்தகத்தை எளிதாக்க புதிய நாணயத்தை உருவாக்கும் முயற்சியில் ஈடுபட்டுள்ளது. தென்னாபிரிக்காவில் வருடாந்திர உச்சிமாநாட்டில் BRICS நாடுகள் சந்திக்கும் ஆகஸ்ட் மாதத்தில் புதிய நிதி உடன்படிக்கையை காண முடியும் என்று தெரிவிக்கப்பட்டுள்ளது.
உக்ரைன் மீதான படையெடுப்பு தொடர்பாக மேற்கு நாடுகளின் பொருளாதாரத் தடைகளை எதிர்கொண்டுள்ள நிலையில், இந்த யோசனையின் பின்னணியில் ரஷ்யா இருப்பதாக ஆதாரங்கள் வெளிப்படுத்தியுள்ளன.
அலெக்சாண்டர் பாபகோவ், ரஷ்யாவும் இந்தியாவும் பணம் செலுத்துவதற்குப் பயன்படுத்தக்கூடிய ஒரு பொதுவான நாணயத்தை உருவாக்குவதன் மூலம் பரஸ்பரம் பயனடைய முடியும் என்றும் இந்த நேரத்தில் “மிகவும் சாத்தியமான” பாதை என்றும் குறிப்பிட்டுள்ளார் . “புது டெல்லி, மாஸ்கோ ஒரு புதிய பகிரப்பட்ட நாணயத்துடன் ஒரு புதிய பொருளாதார கூட்டமைப்பை நிறுவ வேண்டும், அது டிஜிட்டல் ரூபிளாகவோ அல்லது இந்திய ரூபாயாகவோ இருக்கலாம்” என்று பாபகோவ் மேற்கோள் காட்டினார்.
மேலும் 1.4 பில்லியன் பங்கேற்பாளர்களை இந்த அமைப்பில் சேர்க்கும் வகையில், பொது நாணயத்தை உருவாக்குவதில் சீனாவும் முக்கிய பங்கு வகிக்கும் என்று அவர் குறிப்பிட்டார். “புது டெல்லி, பெய்ஜிங் மற்றும் மாஸ்கோ ஆகியவை பல்துருவ உலகை உருவாக்கும் திறன் கொண்டவை என்பது பெரும்பான்மையான அரசாங்கங்களால் அங்கீகரிக்கப்பட்டுள்ளன,” என்று அவர் கூறினார். “ நமது பொருளாதார கூட்டமைப்பு என்பது அமெரிக்க டாலரையோ, ஐரோப்பாவின் யூரோவை சார்ந்திருக்காமல் நமது பரஸ்பர நோக்கங்களுக்கும் நலன்களுக்கும் பயன் அளிக்கும் திறன் கொண்ட வகையில் புதிய கரன்சியை உருவாக்க வேண்டும்” என்று குறிப்பிட்டுள்ளார்.
சுவாரஸ்யமாக, பிரேசில் ஏற்கனவே யுவானில் வர்த்தக தீர்வுகள் மற்றும் முதலீடுகளை ஏற்கத் தொடங்கியுள்ளது. இந்தியாவும் ரஷ்யாவும் வர்த்தகத்திற்கான ரூபாய்-ரூபிள் பொறிமுறையைக் கொண்டுள்ளன, அதில் அவர்கள் டாலர் அல்லது யூரோக்களுக்குப் பதிலாக ரூபாய்களில் நிலுவைத் தொகையைச் செலுத்துகிறார்கள்.
BRICS நாடுகள் டாலர் ஆதிக்கம் செலுத்தும் முறையை மாற்ற உத்தேசித்துள்ளன என்பதை இது காட்டுகிறது, இது இறுதியில் உலகம் முழுவதும் டாலர் மதிப்பிழப்புக்கு வழிவகுக்கும்.
BRICS நாணயத்தின் தாக்கங்கள்
BRICS நாடுகள் தங்கள் திட்டத்தை முன்னோக்கிச் சென்று புதிய நாணயத்தைக் கொண்டு வந்தால், அது அவர்களின் பொருளாதாரத்தை வலிமையாக்க உதவும். முதலீட்டாளர்களின் பார்வையில் BRICS நாடுகளில் இது நுகர்வோர் நம்பிக்கையை அதிகரிக்கும். இது வர்த்தகம் மற்றும் பொருளாதார வளர்ச்சிக்கு வழிவகுக்கும்.
ஆனால் இந்த புதிய நாணயத்தை இந்தியா ஏற்குமா? எல்லையில் முட்டுக்கட்டை போடும் சீனாவுடன் பொருளாதார ரீதியாக ஒத்துப்போக விரும்புமா? மேலும், இந்த புதிய ஒப்பந்தம் புதுடெல்லியை விட பெய்ஜிங்கிற்கு அதிக பலன் அளிக்கக்கூடும் என்று சில நிபுணர்கள் கூறுகின்றனர்.
அடுத்து என்ன நடக்கும் என்பது தெரியவில்லை. ஆனால் டாலர் சக்தியை இழக்கிறது என்பது நிச்சயம்.
குறிப்பு : உலகை மேலாதிக்கும் செய்து வரும் அமெரிக்காவை அதன் உயிர்நாடியில் அடிக்கும் உலக நாடுகளின் முன்னெடுப்பே டாலர் நீக்கம். அதாவது உலக செலாவணியாக சர்வாதிகாரம் செய்யும் டாலரை நீக்கிவிட்டு, உலக வர்த்தகத்திற்கு மாற்றாக புதிய நாணயத்தை நிலை நிறுத்த பல்வேறு நாடுகள் முனைப்பு காட்டுகின்றன. அவற்றில் பிரிக்ஸ் கூட்டமைப்பிலுள்ள ரசியா, இந்தியா, சீனா உள்ளிட்ட பெரும் நாடுகளும் அடக்கம்.
நன்றி
மொழியாக்கம்: தாமோதரன்
